పత్తి సాగులో హై డెన్సిటీ ప్లాంటింగ్ విధానం: రైతులకు ఎక్కువ దిగుబడి

తెలంగాణలో 19 జిల్లాల్లో పత్తి ఉత్పాదకత పెంచేందుకు కేంద్ర ప్రభుత్వం కాటన్ ప్రొడక్టివిటీ మిషన్ 2026 పథకాన్ని అమలు చేస్తోంది. ఇందులో భాగంగా హై డెన్సిటీ ప్లాంటింగ్ సిస్టమ్ (HDPS) ద్వారా పత్తి సాగుకు రైతులకు ఉచితంగా విత్తనాలు పంపిణీ చేస్తున్నట్లు వ్యవసాయ శాఖ అధికారులు తెలిపారు.

ఈ పథకం కింద రాష్ట్రవ్యాప్తంగా 1.84 లక్షల ఎకరాల్లో హై డెన్సిటీ పత్తి సాగు చేయాలని లక్ష్యంగా పెట్టుకున్నారు. ఒక్కో రైతుకు 2.5 ఎకరాల పొలానికి 15 విత్తన ప్యాకెట్లు ఉచితంగా ఇస్తారు. మొత్తం 11.07 లక్షల సీడ్ ప్యాకెట్లను (విలువ రూ.80.94 కోట్లు) రైతు వేదికల ద్వారా పంపిణీ చేయనున్నారు. ఈ పథకాన్ని 2026 వానాకాలం నుంచి 2030-31 వరకు అమలు చేయనున్నట్లు అధికారులు వివరించారు.

సాధారణ పద్ధతిలో పత్తి సాళ్ల మధ్య 90-120 సెం.మీ., మొక్కల మధ్య 45-60 సెం.మీ. దూరం ఉంటుంది. హై డెన్సిటీ విధానంలో మొక్కల మధ్య గ్యాప్ 15 సెం.మీ.కు తగ్గిస్తారు. దీనివల్ల ఎకరానికి 25,000-30,000 మొక్కలు నాటవచ్చు. ఈ విధానంలో ఎకరాకు 12-14 క్వింటాళ్ల దిగుబడి వస్తుంది, ఇది సాధారణ దిగుబడి 7-8 క్వింటాళ్లతో పోలిస్తే 60-70% ఎక్కువ.

మొక్కలు తక్కువ ఎత్తు పెరిగి ఒకేసారి పూత కాత వస్తుంది. పంటకాలం 180 రోజుల నుంచి 150-160 రోజులకు తగ్గుతుంది. పికింగ్ కూడా ఒకే విడతలో పూర్తవుతుంది. దీంతో సాగు ఖర్చులు తగ్గడమే కాకుండా రైతులు వెంటనే రెండో పంట వేసుకునే అవకాశం ఉంటుంది.

మంచిర్యాల జిల్లాలో గతేడాది 1.75 లక్షల ఎకరాల్లో పత్తి సాగు కాగా, ఈసారి ఇంచుమించు అదే విస్తీర్ణంలో సాగు అవుతుందని అధికారులు చెబుతున్నారు. జిల్లాలో ఇప్పటివరకు 80,000 ఎకరాల్లో విత్తనాలు నాటగా, ఈ ఏడాది 9,200 ఎకరాల్లో హై డెన్సిటీ పత్తి సాగు చేపట్టనున్నారు. ఎల్నో ప్రభావంతో వర్షాలు ఆలస్యం కావడంతో విత్తనాలు నాటడంలో కొద్దిగా జాప్యం జరిగింది. జూలై 20 వరకు విత్తుకునే అవకాశం ఉందని జిల్లా వ్యవసాయ శాఖ తెలిపింది.