పత్తి పంటలో పురుగుల బెడద పెరిగింది: రైతులకు శాస్త్రవేత్త సూచనలు

తెలుగు రాష్ట్రాల్లో పత్తి పంట వివిధ దశల్లో ఉంది. కొన్ని చోట్ల 20-25 రోజుల వయస్సు, మరికొన్ని చోట్ల 30-40 రోజుల వయస్సులో ఉంది. మబ్బులు, చిరుజల్లులతో కూడిన వాతావరణం కారణంగా రసం పీల్చే పురుగుల ఆశించడం ఎక్కువైంది.

మంచిర్యాల జిల్లా బెల్లంపల్లి కృషి విజ్ఞాన కేంద్రం శాస్త్రవేత్త నాగరాజు మాట్లాడుతూ, "తొలి దశలోనే సమగ్ర సస్య రక్షణ చర్యలు తీసుకోవాలి" అని చెప్పారు. పచ్చదోమ (లీఫ్ హాపర్) నివారణకు వేపనూనె ఆధారిత అజాడిరెక్టిన్ 1500 ppm 5 మి.లీ./లీటర్ నీటికి కలిపి పిచికారీ చేయాలని సూచించారు.

తామర పురుగు (త్రిప్స్) కోసం ఫిప్రోనిల్ 2 మి.లీ./లీ., లేదా రంగు జిగురు ట్రాప్‌లు పెట్టాలి. పేను బంక (ఆఫిడ్స్) ను అజాడిరెక్టిన్ లేదా ఎసిఫేట్ 1.5 గ్రా./లీ. తో అదుపు చేయవచ్చు. 30,40,60 రోజుల దశల్లో మోనోక్రోటోఫాస్ ను 1:4 నిష్పత్తిలో కాండానికి పూయడం, 60 రోజుల వయసులో ఇమిడాక్లోప్రిడ్/క్లోతియానిడిన్ 1:20 నిష్పత్తిలో కాండానికి పూయడం వల్ల రసం పీల్చే పురుగులను తట్టుకోవచ్చని నాగరాజు తెలిపారు. ఇవి మేలు చేసే కీటకాలను కాపాడతాయి.

లద్దె పురుగు (స్పాటెడ్ బాల్వార్మ్) ఉదృతి కనిపిస్తే నీమ్ ఆయిల్ పిచికారీ, లింగాకర్షక బుట్టలు, విషపు ఎరలు వంటి సమగ్ర యాజమాన్యం ద్వారా అదుపు చేయాలన్నారు. పింక్ బాల్వార్మ్ (గులాబీ రంగు పురుగు) నివారణకు 45 రోజుల నుంచి లింగాకర్షక బుట్టలు (ఎకరాకు 4-8) పెట్టి, తొలి లార్వాలను అజాడిరెక్టిన్ 5 మి.లీ./లీ.తో పాటు డిటర్జెంట్/స్టిక్కింగ్ ఏజెంట్ కలిపి పిచికారీ చేయాలి.

వాతావరణ మార్పుల నేపథ్యంలో రైతులు ముందస్తు నిఘా, సమయానుకూల నివారణ చర్యలతో పురుగుల బెడదను తక్కువ ఖర్చుతో అదుపు చేసుకోవచ్చని శాస్త్రవేత్త వివరించారు.