కరోనా కొత్త సబ్ వేరియంట్ PJ.2.1.1: లక్షణాలు, వ్యాప్తి వివరాలు

కరోనా వైరస్ కొత్త సబ్ వేరియంట్ PJ.2.1.1 కేసులు పలు దేశాల్లో నమోదవుతున్నాయి. ఈ వేరియంట్‌పై అంతర్జాతీయ వైద్య నిపుణులు, ప్రపంచ ఆరోగ్య సంస్థ దృష్టి సారించాయి. వేగంగా వ్యాపిస్తున్నప్పటికీ ఇది పాత వేరియంట్ల కంటే ప్రమాదకరం కాదని అధ్యయనాలు చెబుతున్నాయి.

ఒక ప్రీ ప్రింట్ అధ్యయనం ప్రకారం ఈ వేరియంట్ తొలి కేసు మే 2న కెనడాలోని ఆంటారియోలో నమోదైంది. ఆ తర్వాత న్యూయార్క్, స్పెయిన్, ఫ్రాన్స్, ఇజ్రాయెల్, సింగపూర్, ఆస్ట్రేలియాలోనూ కేసులు వెలుగుచూశాయి. స్పైక్ ప్రోటీన్‌లో మ్యూటేషన్ల కారణంగా ఇది మానవ కణాల రిసెప్టర్లకు బలంగా అతుక్కుపోతుందని ల్యాబ్ పరీక్షల్లో శాస్త్రవేత్తలు గుర్తించారు. దీంతో ఒకరి నుంచి ఒకరికి సంక్రమించే వేగం ఎక్కువగా ఉంటుందని వారు తెలిపారు.

జ్వరం, తగ్గని పొడి దగ్గు, ముక్కు దిబ్బడ, తీవ్రమైన తలనొప్పి, ఒళ్లు నొప్పులు ప్రధాన లక్షణాలుగా కనిపిస్తున్నాయని నిపుణులు చెబుతున్నారు. ఇవి సాధారణ జలుబు, ఫ్లూ లక్షణాల మాదిరిగానే ఉంటున్నాయి.

రష్యన్ వైరాలజిస్ట్ ఎలనా మలినికోవా పరిశోధన ప్రకారం ఈ వేరియంట్ సోకిన వారిలో గొంతు నొప్పి తీవ్రంగా ఉంటుంది. ఇన్ఫెక్షన్ తగ్గిన తర్వాత కూడా దీర్ఘకాలం అలసట వేధిస్తుందని ఆమె తెలిపారు. లక్షణాల ద్వారా మాత్రమే దీన్ని గుర్తించడం కష్టమని, మెడికల్ టెస్టులు మాత్రమే ఖచ్చితమైన సమాధానం ఇస్తాయని నిపుణులు చెబుతున్నారు.

Journal of Infection ప్రచురించిన నివేదిక ప్రకారం ఇది పాత వేరియంట్ల కంటే ప్రమాదకరమని చెప్పడానికి ఆధారాలు లేవు. ఇప్పటికే ఉన్న వ్యాక్సిన్ల రోగనిరోధక శక్తిని ఇది తప్పించుకోలేదని నివేదిక పేర్కొంది. ఆసుపత్రుల్లో చేరే వారి సంఖ్య, మరణాల ప్రమాదం పెరగలేదని స్పష్టమైంది.

అయినా వృద్ధులు, డయాబెటిస్, గుండె జబ్బులు, ఆస్తమా ఉన్నవారు, రోగనిరోధక శక్తి తక్కువగా ఉన్నవారు అప్రమత్తంగా ఉండాలని వైద్యులు హెచ్చరిస్తున్నారు. రద్దీ ప్రాంతాల్లో మాస్క్ ధరించాలని, చేతులు శుభ్రంగా కడుక్కోవాలని సూచిస్తున్నారు. గాలి వెలుతురు ధారాళంగా ఉండే ప్రదేశాల్లో ఉండడం మంచిదని, అనారోగ్య లక్షణాలు కనిపిస్తే ఇతరులకు దూరంగా ఉండాలని సూచించారు.