సైబరాబాద్ ఐటి కారిడార్‌లో భారీ ట్రాఫిక్; రోజూ 11 లక్షల వాహనాలు

సైబరాబాద్‌ ఐటి కారిడార్‌లో ప్రతి రోజు 11 లక్షలకు పైగా వాహనాలు రాకపోకలు సాగిస్తున్నాయి. దీంతో వాహనదారులు తీవ్ర ఇబ్బందులు పడుతున్నారు. వర్షం కురిసినప్పుడు పరిస్థితి మరింత దిగజారుతోంది.

హైటెక్ సిటీ, రాయదుర్గం, గచ్చిబౌలి, ఫైనాన్షియల్ డిస్ట్రిక్ట్, నానకర్రంగూడ తదితర ప్రాంతాల్లో చిన్నపాటి వర్షానికే కిలోమీటర్ల మేర ట్రాఫిక్ జామ్ అవుతోంది. సైబరాబాద్ ట్రాఫిక్ పోలీసులు ఈ సమస్యను అధిగమించేందుకు ప్రత్యేక ప్రణాళికలు సిద్ధం చేశారు. వర్షం సమయంలో జంక్షన్ల వద్ద నీరు నిలిచిపోతే వివిధ శాఖల సహకారంతో దాన్ని క్లియర్ చేస్తున్నారు. ట్రాఫిక్ మళ్లించేందుకు యూ టర్న్ల వంటి ఏర్పాట్లతో ప్లాన్ బి కూడా అమలు చేస్తున్నారు.

పోలీసులు గూగుల్ మ్యాప్స్, వాతావరణ సమాచారం ఆధారంగా ట్రాఫిక్‌ను మేనేజ్ చేస్తున్నారు. సొసైటీ ఫర్ సైబరాబాద్ సెక్యూరిటీ కౌన్సిల్ (ఎస్సీఎస్సీ) ద్వారా ఐటి కంపెనీలకు ముందస్తు అడ్వైజరీ పంపిస్తున్నారు. ఈ అడ్వైజరీ ఆధారంగా కంపెనీలు తమ ఉద్యోగులకు రోడ్లపై రాకముందే సూచనలు ఇస్తున్నాయి.

ట్రాఫిక్ పోలీసులు చేసిన సర్వేలో 50 శాతం వాహనాలు సింగిల్ ఆక్యుపెన్సీతోనే ప్రయాణిస్తున్నట్లు తేలింది. అందువల్ల కార్ పూలింగ్, కంపెనీ బస్సులు, షటిల్ సర్వీసులు వినియోగించాలని సూచిస్తున్నారు. మెట్రో, ఆర్టీసి బస్సులు ఎక్కువగా ఉపయోగించడం వల్ల 40 నుంచి 50 శాతం వరకు ట్రాఫిక్ తగ్గుతుందని అంచనా. కంపెనీలు ఆఫీస్ టైమింగ్స్ మార్చుకోవడం, ఉద్యోగులు వ్యక్తిగత వాహనాల వినియోగాన్ని తగ్గించుకోవడం వల్ల ఐటి ఏరియాలో ట్రాఫిక్ జామ్ సమస్య పరిష్కారమవుతుందని పోలీసులు విజ్ఞప్తి చేశారు.