అర్ణబ్ తుఫాన్: ఏపీలో ₹4,600 కోట్ల ప్రాథమిక నష్టం అంచనా

అర్ణబ్ తుఫాన్ వల్ల ఆంధ్రప్రదేశ్‌లో ప్రాథమికంగా ₹4,600 కోట్ల నష్టం జరిగినట్లు అధికారులు అంచనా వేస్తున్నారు. ఈ నష్టాన్ని పరిశీలించేందుకు కేంద్ర బృందాలు రాష్ట్రంలో పర్యటిస్తున్నాయి.

అక్టోబర్ 29 రాత్రి వరకు అందిన నివేదికల ప్రకారం 3,631 ఇళ్లు, 3,000కు పైగా గుడిసెలు దెబ్బతిన్నాయి. 3.33 లక్షల హెక్టార్లకు పైగా పంటలు నీట మునిగాయి. 21,837 హెక్టార్ల ఉద్యాన పంటలు కూడా ప్రభావితమయ్యాయి. వరి, అరటి, చెరకు పంటలకు భారీ నష్టం జరిగింది.

కోనసీమ, పశ్చిమ గోదావరి, కాకినాడ, తూర్పు గోదావరి, కృష్ణా జిల్లాల్లో పంట నష్టం ఎక్కువగా ఉంది. రోడ్లపై 2,199 చెట్లు నేలకూలాయి. 2,803 కిలోమీటర్లకు పైగా రోడ్లు దెబ్బతిన్నాయి. 61 చోట్ల రోడ్లకు గుంతలు పడ్డాయి.

విద్యుత్ శాఖకు ₹500 కోట్ల ప్రాథమిక నష్టం వాటిల్లింది. పశ్చిమ గోదావరి జిల్లాలో 3,700 విద్యుత్ స్తంభాలు దెబ్బతిన్నాయి. దీంతో సుమారు 400 గ్రామాలకు విద్యుత్ సరఫరాలో అంతరాయం ఏర్పడింది. గోడలు కూలడం, విద్యుత్ ప్రమాదాల కారణంగా రాష్ట్రవ్యాప్తంగా ఏడుగురు మృతి చెందినట్లు అధికారులు ప్రకటించారు.

ముఖ్యమంత్రి చంద్రబాబు నాయుడు వరద ప్రభావిత ప్రాంతాలను సందర్శించారు. మునిగిన పంట పొలాలు, సహాయ పునరావాస కేంద్రాలను ఆయన పరిశీలించారు. విద్యుత్ సిబ్బంది కొరత ఉండటంతో తెలంగాణ, తమిళనాడు, కర్ణాటక నుంచి సిబ్బందిని రప్పించే ప్రయత్నాలు జరుగుతున్నాయి. కేంద్ర బృందాల పర్యటన, పూర్తి స్థాయి నివేదిక తర్వాత నష్టం మరింత పెరిగే అవకాశం ఉంది.