పార్వతీపురం మన్యం జిల్లాలో అర్ణబ్ తుఫాను ప్రభావం.. RTC బస్సులు నిలిపివేత

పార్వతీపురం మన్యం జిల్లాలో అర్ణబ్ తుఫాను తీవ్ర ప్రభావం చూపింది. జిల్లాలో రవాణా వ్యవస్థ స్తంభించింది. ఆర్టీసి బస్సులు డిపోలకే పరిమితమయ్యాయి. ఉన్నతాధికారులు క్షేత్రస్థాయి పరిస్థితిని పర్యవేక్షిస్తున్నారు.

పాచిపెంట మండలం గుమ్మిడిగుడ్డి వలసలో తుఫాను ధ్వంసంతో ఇంటి గోడ కూలింది. ఈ ఘటనలో మల్లేష్, పార్వతీ దంపతులు, వారి ఎనిమిది నెలల పాప తీవ్రంగా గాయపడ్డారు. క్షతగాత్రులను ముందుగా సాలూరు ప్రాంతీయ ఆసుపత్రికి తరలించారు. అనంతరం మెరుగైన చికిత్స కోసం విజయనగరం సర్వజన ఆసుపత్రికి తరలించారు.

గాయపడిన కుటుంబాన్ని మంత్రి సంధ్యారాణి పరామర్శించారు. వారికి ధైర్యం చెప్పారు. అండగా ఉంటామని భరోసా ఇచ్చారు.

వేగావతి నది పొంగిపొర్లడంతో సాలూరులో వరద నీరు చేరింది. రామ కాలనీ, శ్రీనివాస్ కాలనీ, లెప్సీ కాలనీతో పాటు ఆర్టీసి కాంప్లెక్స్ ప్రాంతానికి నీరు చేరింది. సాలూరు మండలం మామిడిపల్లిలో బ్రిడ్జ్ స్తంభాలు పూర్తిగా నీటిలో మునిగిపోయాయి. మామిడిపల్లి లిఫ్ట్ ఇరిగేషన్ పరిసరాలకు వరద చేరింది.

ప్రయాణికుల భద్రత కోసం ఆర్టీసి బస్సులు నిలిపివేశారు. ఉదయం నుంచే బస్సులు కాంప్లెక్స్ దాటలేదని అధికారులు చెప్పారు. నదులు, వాగులు, గెడ్డలు ఉన్న ప్రాంతాల్లో బస్సుల రాకపోకలు పూర్తిగా నిలిపేశారు. దీంతో ప్రయాణికులు గమ్యస్థానాలకు ఎలా చేరాలో తెలియక ఇబ్బంది పడుతున్నారు.

సాలూరులోని భాష్యం స్కూల్లో ఏర్పాటు చేసిన పునరావాస కేంద్రాన్ని మంత్రి సంధ్యారాణి సందర్శించారు. బాధితులకు భోజనం, దుప్పట్లు, దుస్తులు, నిత్యావసర వస్తువులు వెంటనే అందించాలని అధికారులను ఆదేశించారు. మున్సిపాలిటీలోని 29వ వార్డులో 46 కుటుంబాలను సురక్షిత ప్రాంతాలకు తరలించారు. వచ్చే ఏడాది నిరుపేదలకు పక్కా ఇళ్లు మంజూరు చేస్తామని మంత్రి హామీ ఇచ్చారు.