ట్రెడ్మిల్ మీద రోజుకు ఎంతసేపు నడిస్తే బరువు తగ్గుతారు? — నిపుణుల సూచనలు

ట్రెడ్మిల్ మీద నడవడం ద్వారా బరువు తగ్గాలనుకునే వారికి ఫిట్నెస్ నిపుణులు కొన్ని సూచనలు చేశారు. వారి ప్రకారం, వారంలో కనీసం 300 నిమిషాల పాటు వ్యాయామం చేయడం మంచిది. ఇది రోజుకు సుమారు 43 నుంచి 45 నిమిషాల ట్రెడ్మిల్ నడకకు సమానం.

బరువు తగ్గడం కోసం ఇప్పుడే వ్యాయామం మొదలుపెట్టిన వారు మొదటి రోజే 45 నిమిషాలు నడవాలని లేదు. 15 నుంచి 20 నిమిషాలతో ప్రారంభించి, శరీరం అలవాటు పడే వరకు క్రమంగా సమయాన్ని పెంచాలి. ఇలా చేస్తే అలసట, కండరాల నొప్పులు రావు.

ట్రెడ్మిల్ పై నడిచే వేగం కూడా కీలకం. నెమ్మదిగా నడవడం కంటే బ్రిస్క్ వాకింగ్ వల్ల ఎక్కువ క్యాలరీలు ఖర్చవుతాయి. బరువు తగ్గాలంటే వ్యాయామంతో పాటు ఆహారపు అలవాట్లు కూడా మార్చుకోవాలి. సమతుల ఆహారం, తగినంత నీరు, సరిపడా నిద్ర అవసరమని నిపుణులు సూచిస్తున్నారు.

నడిచేటప్పుడు శరీరాన్ని నిటారుగా ఉంచి, చేతులను సహజంగా ఊపుతూ నడవడం వల్ల ఎక్కువ కండరాలు పనిచేస్తాయి. దీంతో బరువు తగ్గడం సులభం అవుతుంది.