ఫిరోజాబాద్‌లో 18 నెలల బాలుడి హత్య: నిందితుడికి 40 రోజుల్లోనే మరణశిక్ష

ఉత్తరప్రదేశ్‌లోని ఫిరోజాబాద్‌లో 18 నెలల బాలుడిని హత్య చేసిన కేసులో నిందితుడు జితేంద్ర (అలియాస్ విరాజ్)కు కోర్టు మరణశిక్ష విధించింది. హత్య జరిగిన 40 రోజుల్లోనే ఈ తీర్పు వెలువడింది.

ఈ ఏడాది మే నెలలో ఈ ఘటన చోటు చేసుకుంది. బాలుడి తల్లి రతిదేవి ఓ ప్రైవేట్ టీచర్‌గా పనిచేస్తున్నారు. భర్త నుంచి విడిపోయిన ఆమె తన తల్లిదండ్రులతో నివసిస్తున్నారు. విడాకుల కేసు విషయంలో సాయం చేస్తానని చెప్పి జితేంద్ర ఆమెకు పరిచయమయ్యాడు. ఆమెపై మనసు పారేసుకున్న అతను పెళ్లి ప్రతిపాదన చేశాడు. రతిదేవి నిరాకరించడంతో కోపంతో ఉన్న జితేంద్ర, చాక్లెట్ కొనిస్తానని చెప్పి బాలుడిని ఇంటికి 50 మీటర్ల దూరంగా తీసుకెళ్లాడు. అక్కడ చిన్నారిని పదేపదే నేలకేసి కొట్టి చంపాడు.

కుటుంబ సభ్యులు గమనించి బాలుడిని ఆస్పత్రికి తరలించినా, అప్పటికే చనిపోయినట్లు వైద్యులు నిర్ధారించారు. కొన్ని గంటల వ్యవధిలోనే పోలీసులు నిందితుడిని అరెస్ట్ చేశారు. ఈ ఎన్కౌంటర్‌లో అతని రెండు కాళ్లకు గాయాలయ్యాయి.

దర్యాప్తు వేగంగా పూర్తి చేసిన పోలీసులు ఆరు రోజుల్లోనే ఛార్జ్‌షీట్ దాఖలు చేశారు. బాలుడి తల్లితో రిలేషన్‌షిప్‌కు అడ్డు అన్న కారణంతోనే హత్య చేసినట్లు కోర్టు నిర్ధారించింది. నేరం నిరూపణ కావడంతో 40 రోజుల్లోనే మరణశిక్ష విధిస్తూ తీర్పు వచ్చింది.