వాయువ్య బంగాళాఖాతంలో అల్పపీడనం వాయుగుండంగా మారింది; ఉత్తరాంధ్రకు వర్ష సూచన

వాయువ్య బంగాళాఖాతంలో ఏర్పడిన అల్పపీడనం వాయుగుండంగా మారింది. ఇది 24 గంటల్లో తీవ్ర వాయుగుండంగా బలపడవచ్చని అమరావతి విపత్తుల నిర్వహణ సంస్థ తెలిపింది. ఈ వ్యవస్థ ఇవాళ పారాదీప్-సాగర్ ద్వీపాల మధ్య తీరం దాటుతుందని అంచనా.

దీని ప్రభావంతో ఉత్తరాంధ్ర తీరం వెంట గంటకు 55 నుంచి 65 కిలోమీటర్ల వేగంతో ఈదురుగాలులు వీస్తాయి. సముద్రం తీవ్రంగా అలజడిగా ఉంటుంది. మత్స్యకారులు మరో రెండు రోజుల పాటు వేటకు వెళ్లవద్దని హెచ్చరించారు. తీర ప్రాంత ప్రజలు అప్రమత్తంగా ఉండాలని సూచించారు.

ఇవాళ ఉత్తరాంధ్రలో తేలికపాటి నుంచి మోస్తారు వర్షాలు కురుస్తాయి. శ్రీకాకుళం, విజయనగరం, మన్యం, అల్లూరి సీతారామరాజు, పోలవరం, విశాఖపట్నం, కోనసీమ జిల్లాల్లో వర్షం కురిసే అవకాశం ఉంది. వాతావరణ పరిస్థితులను ఎప్పటికప్పుడు గమనించి జాగ్రత్తలు తీసుకోవాలని సంస్థ వెల్లడించింది.