దీపావళికి ముందే ఢిల్లీలో కాలుష్యం ప్రమాదకర స్థాయి: సగటు AQI 387

ఢిల్లీలో దీపావళికి ముందే వాయు కాలుష్యం ప్రమాదకర స్థాయికి చేరింది. నగరంలో సగటు AQI 387గా నమోదైంది. ఇది 'వెరీ పూర్' విభాగంలో ఉంది. తీవ్రమైన 'సీవియర్' స్థాయికి ఇది దగ్గరగా ఉంది.

నగరంలో సగానికి పైగా ఎయిర్ క్వాలిటీ మానిటరింగ్ కేంద్రాల్లో రెడ్ అలర్ట్ స్థాయి నమోదైంది. పలు ప్రాంతాల్లో AQI 400 పాయింట్లను దాటింది. నగరమంతా దట్టమైన పొగమంచు కమ్ముకుంది. ఇది కేవలం పొగమంచు కాదు, కాలుష్య పొర కూడా.

సెంట్రల్ ఢిల్లీలోని రైసినా హిల్స్ ప్రాంతంలో ఈ ప్రభావం స్పష్టంగా కనిపించింది. నార్త్ బ్లాక్, సౌత్ బ్లాక్, పార్లమెంట్ భవనం ఎదురుగా ఉన్న రాష్ట్రపతి భవన్ కూడా కనిపించలేదు. కాలుష్య పొర కారణంగా ఆ ప్రాంతం మొత్తం కమ్ముకుపోయింది.

కాలుష్యానికి గురైతే కళ్ల మంటలు, గొంతు నొప్పి, దగ్గు, శ్వాస తీసుకోవడంలో ఇబ్బంది తలెత్తుతాయని వైద్యులు, నిపుణులు చెప్తున్నారు. వీలైనంత వరకు ఇళ్లలోనే ఉండాలని వారు సూచిస్తున్నారు. అవసరమైతే ఎయిర్ ఫిల్టర్లు వాడాలని కూడా చెప్తున్నారు.

దీపావళి తర్వాత కాలుష్యం మరింత పెరిగే అవకాశం ఉంది. టపాసులు పేలిస్తే కాలుష్యం ఇంకా పెరుగుతుందని చర్చ జరుగుతోంది. గత అనుభవాల ఆధారంగా ముందస్తు చర్యలపై ఢిల్లీ యంత్రాంగం దృష్టి పెట్టింది.