ఢిల్లీలో భారీ వర్షం: రెడ్ అలర్ట్ జారీ, లోతట్టు ప్రాంతాలు జలమయం

ఢిల్లీలో కుండపోత వర్షం కురుస్తోంది. భారత వాతావరణ శాఖ (IMD) ఢిల్లీకి రెడ్ అలర్ట్ జారీ చేసింది.

లోతట్టు ప్రాంతాలన్నీ నీటిలో మునిగాయి. దుర్గా విహార్, బారాఖంబా రోడ్ ప్రాంతాల్లో వరద నీరు ఇళ్లలోకి చేరింది. ఖాన్ మార్కెట్లో రోడ్డుపై భారీగా నీరు నిలిచింది.

వర్షం కారణంగా వాహనదారులు తీవ్ర ఇబ్బందులు ఎదుర్కొంటున్నారు. పలు ప్రాంతాల్లో ట్రాఫిక్ జామ్ అయింది. కార్యాలయాలకు వెళ్లేవారు నెమ్మదిగా ప్రయాణించాల్సి వచ్చింది.

IMD అధికారులు ఇవాళ, రేపు భారీ నుంచి అతి భారీ వర్షాలు కురిసే అవకాశం ఉందని హెచ్చరించారు. ఉరుములు, మెరుపులతో కూడిన వర్షం కొనసాగుతుందని తెలిపారు. మరికొన్ని ప్రాంతాలకు ఆరెంజ్ అలర్ట్ జారీ చేశారు.

ప్రజలు అప్రమత్తంగా ఉండాలని అధికారులు సూచించారు. అత్యవసరమైతే తప్ప బయటకు రావద్దన్నారు. పాత భవనాల వద్ద ఉండొద్దని, కాంపౌండ్ గోడల వద్ద వాహనాలు నిలపవద్దని హెచ్చరించారు.

ఢిల్లీ ప్రభుత్వం అప్రమత్తమైంది. నీరు నిలిచే ప్రాంతాల్లో మోటార్లతో నీటిని తోడే పనులు చేపట్టారు. రాబోయే ఒకటి రెండు రోజులు ఇదే పరిస్థితి కొనసాగుతుందని IMD తెలిపింది.