డ్రోన్ బ్యాటరీ పడి హోం మంత్రి వంగలపూడి అనిత చేతికి గాయం

అమరావతి ఛాంపియన్షిప్ పోటీలు జరుగుతున్న సమయంలో డ్రోన్ బ్యాటరీ ఊడి పడింది. ఏపీ హోం మంత్రి వంగలపూడి అనిత కుడి చేతిపై ఆ బ్యాటరీ పడి గాయమైంది.

డ్రోన్ బ్యాటరీ ఛార్జింగ్ తగ్గడంతో డ్రోన్ అదుపు తప్పి కింద పడిపోయినట్లు తెలుస్తోంది. ఈ క్రమంలో డ్రోన్ నుంచి బ్యాటరీ ఊడి మంత్రి చేతిపై పడింది. అక్కడ ఉన్న అధికారులు, సెక్యూరిటీ సిబ్బంది వెంటనే అప్రమత్తమయ్యారు.

SP సుబ్బారాయుడు మంత్రి అనితకు ప్రథమ చికిత్స అందించారు. గాయమైన చేతికి బ్యాండేజ్ వేశారు. మంత్రి అనిత తన ప్రసంగాన్ని కొనసాగించి కార్యక్రమం పూర్తి చేశారు.

పోలీసులు డ్రోన్‌ను స్వాధీనం చేసుకున్నారు. ఘటనపై దర్యాప్తు ప్రారంభించారు. బ్యాటరీ ఛార్జింగ్ తగ్గడమా, సాంకేతిక లోపమా, నిర్వాహకుల నిర్లక్ష్యమా అనే కోణాల్లో విచారణ జరుగుతోంది.

ముఖ్య అతిథులు పాల్గొనే కార్యక్రమాల్లో డ్రోన్ల వినియోగంలో భద్రతా నిబంధనలు పాటించారా అనే అంశాన్ని అధికారులు పరిశీలిస్తున్నారు. ఈ ఘటనలో మంత్రి అనితకు స్వల్ప గాయం మాత్రమే జరిగింది.