డీజీపీ సీవీ ఆనంద్ పోలీస్ స్టేషన్ల సరిహద్దుల పునర్వ్యవస్థీకరణకు ఆదేశాలు

తెలంగాణ డీజీపీ సీవీ ఆనంద్ పోలీస్ స్టేషన్ల సరిహద్దుల పునర్వ్యవస్థీకరణపై సుదీర్ఘ సమీక్ష నిర్వహించారు. హైదరాబాద్, సైబరాబాద్, మల్కాజగిరి, ఫ్యూచర్ సిటీ కమిషనరేట్ల పరిధిలోని పోలీస్ స్టేషన్ల హద్దులను మార్చాలని ఈ సమావేశంలో అధికారులకు సూచించారు.

కొత్త సరిహద్దులు ఇష్టారీతిగా కాకుండా ప్రభుత్వ రికార్డుల ప్రకారం ఉండాలని డీజీపీ స్పష్టం చేశారు. మున్సిపల్, రెవెన్యూ, కోర్టు పరిధులను ఖచ్చితంగా పరిగణనలోకి తీసుకోవాలన్నారు. పట్టణ విస్తరణ, జనాభా పెరుగుదలను దృష్టిలో ఉంచుకుని దీర్ఘ కాల ప్రణాళికతో ముందుకు వెళ్లాలని ఆయన అధికారులకు సూచించారు.

ఈ పునర్వ్యవస్థీకరణ వల్ల సామాన్య ప్రజలకు, ప్రభుత్వ శాఖలకు, కోర్టు విచారణలకు ఎలాంటి అసౌకర్యం కలగకూడదని డీజీపీ ఉద్ఘాటించారు. భౌగోళిక పరిస్థితులకు అనుగుణంగా శాస్త్రీయంగా సరిహద్దులు నిర్ణయించాలని ఆదేశించారు. ఈ చర్యలతో నగరంలో పోలీసింగ్ మరింత మెరుగవుతుందని ఉన్నతాధికారులు భావిస్తున్నారు.