డీకే శివకుమార్ నేడు కర్ణాటక ముఖ్యమంత్రిగా ప్రమాణ స్వీకారం

డీకే శివకుమార్ నేడు కర్ణాటక ముఖ్యమంత్రిగా ప్రమాణ స్వీకారం చేస్తారు. బెంగళూరులోని లోక్ భవన్‌లో సాయంత్రం 4:05 నిమిషాలకు ఈ కార్యక్రమం జరుగుతుంది.

ఈ ప్రమాణ స్వీకారోత్సవానికి కాంగ్రెస్ పార్టీ అగ్రనేతలు హాజరవుతారు. లోక్‌సభ ప్రతిపక్ష నేత రాహుల్ గాంధీ, AICC అధ్యక్షుడు మల్లికార్జున ఖర్గే, ప్రియాంక గాంధీ, KC వేణుగోపాల్ హాజరవుతారని పార్టీ వర్గాలు తెలిపాయి.

నూతన మంత్రివర్గ కూర్పుపై కొద్ది రోజులుగా హైకమాండ్‌తో చర్చలు జరిగాయి. శివకుమార్, సిద్దరామయ్య రాహుల్ గాంధీ, ఖర్గేలతో భేటీ అయ్యారు. మొదటి విడతలో 10 మంది మంత్రుల ప్రమాణ స్వీకారం ఉంటుందని, మరో 10 మంది పేర్లపై చర్చలు కొనసాగుతున్నాయని సమాచారం.

క్యాబినెట్‌లో సతీష్ జార్కిహోళీ, HK పాటీల్, రామలింగారెడ్డి, కృష్ణ భైరేగౌడ తదితరుల పేర్లు ప్రముఖంగా వినిపిస్తున్నాయి. ఉప ముఖ్యమంత్రిగా పరమేశ్వరన్ బాధ్యతలు స్వీకరించే అవకాశం ఉంది. సిద్దరామయ్య అహింద వర్గానికి చెందిన తన అనుచరులకు మంత్రి పదవులు కావాలని లాబీయింగ్ చేస్తున్నారని పార్టీ వర్గాలు తెలిపాయి.

35 మందికి పైగా నేతలు క్యాబినెట్‌లో స్థానం కోసం దరఖాస్తు చేసుకున్నారు. ఫైనల్ జాబితా త్వరలో వెలువడుతుందని ఒక సీనియర్ నేత తెలిపారు.