అనంతపురం: అనుమతులు లేని ల్యాబ్‌లపై DMHO దాడులు, లోపల మనుషులు ఉండగా తాళాలు వేసిన అధికారులు

అనంతపురం జిల్లా తాడిపత్రిలో అనుమతులు లేని వైద్య పరీక్ష ల్యాబ్‌లపై జిల్లా వైద్య ఆరోగ్య శాఖ అధికారులు (DMHO) ఆకస్మిక తనిఖీలు నిర్వహించారు. అనుమతి లేకుండా నిర్వహిస్తున్న ల్యాబ్‌లను గుర్తించి సీజ్ చేసి తాళాలు వేశారు.

ఈ క్రమంలో ఒక ల్యాబ్‌లో వ్యక్తులు ఉండగానే అధికారులు తాళాలు వేసి వెళ్లిపోయారు. లోపల ఉన్నవారి కేకలు విన్న స్థానికులు వెంటనే పోలీసులకు సమాచారం ఇచ్చారు. పోలీసులు సంఘటనా స్థలానికి చేరుకుని లోపల ఉన్నవారిని బయటకు తీశారు. తాళాలు వేసే ముందు సరిగా పరిశీలించకపోవడంపై స్థానికులు ఆగ్రహం వ్యక్తం చేశారు.

అధికారులు మాట్లాడుతూ, “మేం 45 నిమిషాలు అక్కడే ఉన్నాం. చుట్టుపక్కల వారిని విచారించాం. తలుపులు మూసి ఉన్నాయి, కొట్టినా తీయలేదు. ఎవరూ లేరని భావించి సీజ్ చేసి తాళం వేసి వెళ్లాం” అని వివరించారు.

అనుమతులు లేకుండా ల్యాబ్ నిర్వహిస్తే కఠిన చర్యలు తప్పవని, సీజ్ చేయడంతోపాటు కేసులు నమోదు చేసి శిక్ష పడేలా చేస్తామని అధికారులు హెచ్చరించారు.