ట్రెల్లీస్ విధానంలో డ్రాగన్ ఫ్రూట్: కృష్ణ జిల్లా రైతు సేంద్రియ పద్ధతులతో సాగు

కృష్ణా జిల్లా బాపులపాడు మండలం రేమల్లె గ్రామానికి చెందిన రైతు దావులూరి సురేష్, ట్రెల్లీస్ విధానం సాయంతో 5 ఎకరాల్లో డ్రాగన్ ఫ్రూట్ సాగు చేస్తున్నారు. రెండున్నరేళ్ల క్రితం మొక్కలు నాటిన ఆయన, ప్రస్తుతం సేంద్రియ పద్ధతులతో పండిస్తూ దిగుబడిని పెంచుకుంటున్నారు.

ఎకరాకు 5-6 లక్షల రూపాయల పెట్టుబడితో 4,000 నుండి 5,000 మొక్కలు నాటారు. ఎనిమిది అడుగుల ఎత్తులో పోల్స్ ఏర్పాటు చేసి ‘జిగ్-జాగ్’ పద్ధతిలో మొక్కలు నాటారు. నీటి కొరత లేకుండా డ్రిప్ ఇరిగేషన్, వేసవిలో స్ప్రింకర్లు ఉపయోగిస్తున్నారు. పూర్తిగా సోలార్ విద్యుత్తుతోనే నీరు పంపిస్తున్నారు.

రసాయనాలేమీ ఉపయోగించకుండా, కేవలం పశువుల పేడ, ఆవు మూత్రం, బెల్లం వంటి సేంద్రియ ద్రవ్యాలతోనే పంటను కాపాడుతున్నారు. దీని వలన పండ్ల రుచి మెరుగ్గా ఉండటంతో చుట్టుపక్కల వినియోగదారులు నేరుగా పొలానికి వచ్చి కొనుగోలు చేస్తున్నారు.

గతంలో డ్రాగన్ ఫ్రూట్ కిలో రూ.300 వరకు పలికేది. కానీ రాష్ట్రాల వ్యాప్తంగా సాగు విస్తీర్ణం పెరగడంతో ధరలు రూ.100-150కు తగ్గాయి. అయితే రైతు సురేష్ మార్కెట్లోకి వెళ్లకుండా తోట వద్దే చిన్న కాయలు కిలో రూ.100, పెద్దవి రూ.150 చొప్పున అమ్ముతున్నారు. రోజుకు 80-100 కేజీల వరకు అమ్మకాలు జరుగుతాయి. సీజన్లో 200-250 కేజీలు అమ్మగలరు.

మొదటి ఏడాది నాటిన 14వ నెలలోనే కొంత దిగుబడి రాగా, గత ఏడాది ఎకరానికి అర టన్ను మాత్రమే లభించింది. ఈ ఏడాది 5 ఎకరాలకు కలిపి ఇప్పటికే టన్ను దిగుబడి వచ్చింది. మొత్తం సీజన్ ముగిసే నవంబర్ వరకు ఎకరానికి టన్ను రావచ్చని ఆయన అంచనా వేస్తున్నారు. డ్రాగన్ ఫ్రూట్ సీజన్ జూలై మొదటి వారం నుండి నవంబర్ వరకు ఉంటుంది.

తక్కువ పెట్టుబడితో ఎక్కువ దిగుబడిని ఇచ్చే ట్రెల్లీస్ పద్ధతి, సేంద్రియ సాగు, ప్రత్యక్ష విక్రయం వల్ల రైతుకు లాభదాయకంగా మారింది. పెరిగిన పోటీ, ధరల తగ్గుదల ఉన్నప్పటికీ, ఆర్గానిక్ నాణ్యతపై విశ్వాసంతో కస్టమర్లు పొలం వద్దకే వస్తున్నారు.