ద్వారకా తిరుమల ఆలయ భూవివాదం: వైసీపీ నిరసన, రికార్డులు తిరగరాసినట్లు ఎమ్మెల్యే వ్యాఖ్య

ద్వారకా తిరుమల దేవస్థానానికి చెందిన తిమ్మాపురంలోని సంతాన వేణుగోపాల స్వామి ఆలయ భూమిని ఒక సేవా సంఘానికి మ్యుటేషన్ చేయడంపై వివాదం చెలరేగింది. ఈ నేపథ్యంలో వైసీపీ నేతలు ఏలూరు కలెక్టర్ కార్యాలయం ఎదుట నిరసన ప్రదర్శించారు.

1.8 ఎకరాల స్థలాన్ని రెవెన్యూ రికార్డుల్లో మార్పులు చేసి కమ్మ సేవా సంఘం పేరున మ్యుటేషన్ చేసినట్లు ఆరోపణలు వచ్చాయి. ఈ భూమి 130 ఏళ్ల క్రితం నిర్మించిన ఈ ఆలయానికి చెందినదని, గతంలో ఇక్కడ తులసి, గులాబీ మొక్కలు పెంచేవారని దేవాలయ వర్గాలు తెలిపాయి. 1967లో, ద్వారకా తిరుమల దేవస్థానం దత్తత తీసుకునే ముందు, ఒక వ్యక్తి ఈ భూమిని కమ్మ కులం సంక్షేమానికి బహుమతిగా ఇచ్చినట్లు రికార్డుల్లో మార్పులు చేశారని, అయితే ఈ మార్పు అశాస్త్రీయ డాక్యుమెంట్ ఆధారంగా జరిగిందని వైసీపీ నేతలు ఆరోపించారు.

నిరసనలో పాల్గొన్న మాజీ మంత్రులు తానేటి వనిత, చెల్లుబోయిన వేణు దేవాలయ భూమిని కూటమి ప్రభుత్వం పరిరక్షించడం లేదని ఆగ్రహం వ్యక్తం చేశారు. “ఇది దేవుడి భూమి. ప్రభుత్వం కాపాడలేకపోతే దాతల వారసులకు తిరిగి ఇవ్వాలి” అని డిమాండ్ చేశారు.

ఈ వివాదంపై స్పందించిన టీడీపీ ఎమ్మెల్యే మద్దిపాటి వెంకటరాజు, భూమి ప్రస్తుతం పూర్తిగా ప్రభుత్వ ఆధీనంలో ఉందని, అక్రమ మ్యుటేషన్‌ను రద్దు చేసినట్లు తెలిపారు. “రికార్డులు పరిశీలించిన తర్వాత ప్రభుత్వం నిర్ణయం తీసుకుంటుంది. అప్పటివరకు ఈ భూమి ఎవరిదీ కాదు” అని ఆయన స్పష్టం చేశారు.