చెవిలో ఇయర్ బడ్స్ అధిక వాడకం వినికిడి సమస్యలకు దారి తీస్తుందని డాక్టర్ల హెచ్చరిక

ఇయర్ బడ్స్ వాడకం విపరీతంగా పెరిగిపోయింది. గంటల తరబడి వాడటంతో వినికిడి సమస్యలు వస్తాయని వైద్యులు హెచ్చరిస్తున్నారు.

ఇంట్లో, ఆఫీసులో, వాహనాలు నడుపుతూ చాలా మంది బ్లూటూత్ ఇయర్ బడ్స్ ఉపయోగిస్తున్నారు. ఫోన్ కాల్స్, పాటలు, సినిమాలు, ఆటల వంటి వాటికి ఇవి అనివార్యంగా మారాయి. ప్రతి పది మంది స్మార్ట్ ఫోన్ వాడుతున్న వారిలో నలుగురు కంటే ఎక్కువ మంది వీటిని వాడుతున్నట్లు అంచనా.

చిన్నపిల్లలు, కళాశాల విద్యార్థులు, ఉద్యోగులు, వ్యాపారులు ఇలా అందరూ రోజూ ఉపయోగిస్తున్నారు. కానీ ఎక్కువసేపు వాడటంతో చెవి నొప్పి, తలనొప్పి, వినికిడి తగ్గడం వంటి సమస్యలు తలెత్తుతున్నాయి. బ్లూటూత్ నుండి వెలువడే రేడియేషన్ ఆరోగ్యంపై ప్రభావం చూపుతుందని వైద్యులు చెబుతున్నారు.

వీటిని నివారించేందుకు కొన్ని సూచనలు చేశారు. అవసరానికి మించి ఇయర్ బడ్స్ వాడవద్దని, ఎక్కువసేపు మాట్లాడాల్సినప్పుడు వైర్ ఉన్న హెడ్‌ఫోన్లు వాడాలని సలహా ఇచ్చారు. వాల్యూమ్ 60 శాతం లోపు ఉంచాలి. ప్రతి గంటకు 15 నిమిషాలు చెవులకు విరామం ఇవ్వాలి. చెవి నొప్పి, వినికిడి తగ్గినట్లు అనిపిస్తే వెంటనే వైద్యులను సంప్రదించాలి.