Facebook, Instagram ప్రపంచవ్యాప్తంగా మూడు గంటల పాటు స్తంభించాయి

శుక్రవారం రాత్రి Facebook, Instagram వినియోగదారులు ఒక్కసారిగా లాగౌట్ అయ్యారు. దాదాపు మూడు గంటల పాటు ప్రపంచవ్యాప్తంగా ఈ సేవలు అందుబాటులో లేవు.

ఈ విషయాన్ని Meta సంస్థ ధృవీకరించింది. సర్వర్లు కుప్పకూలినట్లు ప్రకటించింది. అయితే అవుటేజ్ కారణాన్ని మాత్రం స్పష్టంగా చెప్పలేదు. మూడు గంటల తర్వాత సేవలు యథావిధిగా పునరుద్ధరించబడ్డాయి.

చాలా మంది తమ ఖాతాలు హ్యాక్ అయ్యాయని ఆందోళన చెందారు. సైబర్ నిపుణుడు వర్ష మాట్లాడుతూ, ఇలాంటి సమయంలో వినియోగదారులు తొందరపడి పానిక్ కావద్దని సూచించారు. ఇంట్లో వేరే వారి ఫోన్లలో కూడా ఇదే సమస్య ఉందేమోనని ఒకసారి చెక్ చేసుకోవాలన్నారు.

అవుటేజ్ లాంటి సంఘటనలు IT ప్రపంచంలో సాధారణమేనని, కానీ మూడు గంటలు ఎక్కువ సమయమేనని వర్ష అభిప్రాయపడ్డారు. ఆన్లైన్ భద్రతపై అవగాహన అవసరమని, ముఖ్యంగా వృద్ధులు, పిల్లలు మోసపోయే అవకాశం ఉందని హెచ్చరించారు.