రాగి సాగులో అగ్గి తెగులు, కాండం తొలుచు పురుగు నివారణకు శాస్త్రవేత్తల సూచనలు

తెలంగాణ, ఉత్తరాంధ్ర, రాయలసీమ ప్రాంతాల్లో రాగి సాగు విస్తరిస్తోంది. చిరుధాన్యాలకు డిమాండ్ పెరగడంతో రైతులు రాగి పండించడానికి ఆసక్తి చూపుతున్నారు. కానీ ఖరీఫ్ సీజన్‌లో అగ్గి తెగులు, కాండం తొలుచు పురుగు పంటకు తీవ్ర నష్టం కలిగిస్తున్నాయి.

పెరుమాళ్ళపల్లె ప్రాంతీయ వ్యవసాయ పరిశోధన స్థానం శాస్త్రవేత్త డాక్టర్ మాధవి లత ఈ తెగుళ్ల నివారణకు సులభమైన చిట్కాలు సూచించారు. ఆమె ప్రకారం, అగ్గి తెగులు మూడు దశల్లో కనిపిస్తుంది — ఆకులపై, కాండం పైన, కంకులపై. ఆకులపై మచ్చలు కనిపించగానే కార్బన్డిజం అనే మందును లీటరు నీటికి ఒక గ్రాము చొప్పున కలిపి మొక్కలపై పిచికారి చేయాలి. తెగులు ఉద్ధృతి ఎక్కువగా ఉంటే వారం తర్వాత మరోసారి పిచికారి చేయడం మంచిది.

కాండం తొలుచు పురుగు ఉధృతి వల్ల మొవ్వు కుళ్ళిపోయి, తెల్ల కంకులు ఏర్పడి గింజలు రావు. పొలంలో ఒక మీటర్‌కు 5–10 తెల్లకంకులు గమనించినప్పుడు మోనోక్రోటోఫాస్ 1.6 మి.లీ. లీటరు నీటికి కలిపి పిచికారి చేయాలి. ఈ సకాల నివారణ చర్యలు పాటిస్తే అధిక దిగుబడులు సాధించవచ్చు.

మార్కెట్‌లో రాగికి మంచి డిమాండ్ ఉండటం, అధిక దిగుబడినిచ్చే మెరుగైన రకాలు అందుబాటులో ఉండటంతో చాలా మంది రైతులు ఈ పంట వైపు మొగ్గు చూపుతున్నారు. యాజమాన్య పద్ధతులు సక్రమంగా పాటిస్తే లాభాలు బాగుంటాయని శాస్త్రవేత్తలు సూచిస్తున్నారు.