తెలంగాణలో ఐదు రోజుల పాటు భారీ వర్షాల హెచ్చరిక

నైరుతి ఋతుపవనాలు తెలంగాణ రాష్ట్రమంతటా పూర్తిగా విస్తరించాయి. దాదాపు 12 రోజుల పాటు అనుకూల పరిస్థితులు లేక ఋతుపవనాల కదలిక మందగించింది. అయితే నిన్నటి నుంచి అనుకూల వాతావరణ పరిస్థితులు ఏర్పడడంతో రాష్ట్రమంతటా మాన్సూన్ విస్తరించింది.

ఈ ప్రభావంతో రాబోయే ఐదు రోజుల పాటు రాష్ట్రంలో విస్తారంగా వర్షాలు కురిసే అవకాశం ఉందని IMD అధికారులు తెలిపారు. తేలికపాటి నుంచి మోస్తరు వర్షాలతో పాటు పలు జిల్లాల్లో భారీ వర్షాలు కురిసే అవకాశం ఉందని అధికారులు వెల్లడించారు. రేపు ఎనిమిది జిల్లాలకు భారీ వర్షాల హెచ్చరిక జారీ చేశారు.

ఆదిలాబాద్, కొమరంభీమ్ ఆసిఫాబాద్, మంచిర్యాల, నిర్మల్, నిజామాబాద్, కరీంనగర్, పెద్దపల్లి మరియు మహబూబాబాద్ జిల్లాలకు హెచ్చరికలు జారీ చేశారు. ఈ జిల్లాల్లో భారీ వర్షాలతో పాటు ఈదురు గాలులు కూడా వీస్తాయని పేర్కొన్నారు. అలాగే 25వ తేదీ నుంచి అన్ని జిల్లాల్లో జోరుగా వర్షాలు కురుస్తాయని అధికారులు చెప్పారు. 25, 26, 27 తేదీలలో హైదరాబాద్ లో కూడా భారీ వర్షాలు కురిసే అవకాశం ఉందని తెలిపారు.

ఉత్తర తెలంగాణ జిల్లాలతో పాటు తూర్పు తెలంగాణలో భద్రాద్రి కొత్తగూడెం, ఖమ్మం, నల్గొండ జిల్లాల్లో కూడా నేడు భారీ వర్షపాతం అలర్ట్ ఉంది. హైదరాబాద్ నగరంలో నేడు సాయంత్రం నుంచి రాత్రి సమయంలో వర్షాలు పడే అవకాశం ఉందని అధికారులు వివరించారు.

గడిచిన 24 గంటల్లో చాలా ప్రాంతాల్లో వర్షాలు కురిశాయి. పెద్దపల్లి జిల్లా కమాన్పూర్ లో అత్యధికంగా 11.6 సెంటీమీటర్ల వర్షపాతం నమోదైంది. సంగారెడ్డి జిల్లా రామచంద్రాపురం మరియు పెద్దపల్లి జిల్లా శ్రీరాంపూర్ లో 114.5 మిల్లీమీటర్ల వర్షం కురిసింది.

వర్షాల ప్రభావంతో ఉష్ణోగ్రతలు తగ్గుముఖం పట్టాయి. అంతకుముందు 43 డిగ్రీలు దాటిన ఉష్ణోగ్రతలు ప్రస్తుతం 41 డిగ్రీలకు పడిపోయాయి. నేడు అత్యధికంగా ఆదిలాబాద్ జిల్లాలో 41.9 డిగ్రీలు నమోదైంది.

ఈ వర్షాల వల్ల పెద్దగా వరద ముప్పు ఉండదని అధికారులు పేర్కొన్నారు. అయితే రైతులు వర్షపు నీటిని వృథాగా పోనీయకుండా తమ పొలాల్లోనే నిలవ చేసుకోవాలని సూచించారు. జూన్ మూడో వారం దాటినా వర్షాలు లేక ఆందోళనలో ఉన్న రైతులు ఇప్పుడు ఋతుపవనాలు విస్తరించడంతో హర్షం వ్యక్తం చేస్తున్నారు.