ఢిల్లీ యమునా నదిలో ఈత కోసం దిగిన నలుగురు విద్యార్థులు కొట్టుకుపోయి గల్లంతు

ఢిల్లీలోని యమునా నదిలో ఈత కోసం దిగిన ఐదుగురు స్నేహితుల్లో నలుగురు ప్రవాహానికి కొట్టుకుపోయిన ఘటన ఆదివారం చోటు చేసుకుంది. వీరిలో ఒకరు ప్రాణాలతో బయటపడగా, మిగిలిన నలుగురు గల్లంతయ్యారు. స్నేహితులంతా ఓ పాఠశాలలో సహాధ్యాయులని పోలీసులు గుర్తించారు.

గల్లంతైన సౌరభ్ తండ్రి తెలిపిన వివరాల ప్రకారం.. ఆదివారం మధ్యాహ్నం సౌరభ్ ఇంటి నుంచి స్నేహితులతో కలిసి బయటకు వెళ్లాడు. యమునా నదిలో స్నానం చేస్తామని కుటుంబ సభ్యులకు చెప్పలేదు. ఐదుగురు స్నేహితులూ కలిసి నదిలో దిగారు. ఒకరి చేయి మరొకరు పట్టుకుని నీటిలో దిగగా, ప్రవాహం ఉధృతంగా ఉండటంతో చేయి జారిపోయి నలుగురూ కొట్టుకుపోయారు. చివర్లో ఉన్న ఒక విద్యార్థి మాత్రం తృటిలో ప్రాణాలతో బయటపడ్డాడు.

సమాచారం అందుకున్న వెంటనే పోలీసులు, నేషనల్ డిజాస్టర్ రెస్పాన్స్ ఫోర్స్ (NDRF) బృందాలు సంఘటనా స్థలానికి చేరుకుని గాలింపు చర్యలు చేపట్టాయి. నదిలో నీటి ఉధృతి ఎక్కువగా ఉండటంతో సహాయక చర్యలు ఇబ్బందికరంగా మారాయి. గల్లంతైన యువకుల ఆచూకీ కోసం పలు ప్రాంతాల్లో బోట్ల సాయంతో వెతుకుతున్నారు. ఇటీవల వర్షాల కారణంగా యమునా నదిలో నీటి మట్టం పెరిగి ప్రమాదకర పరిస్థితులు ఉన్నాయని అధికారులు హెచ్చరించారు.