హనుమకొండలో ఫ్రీ బిర్యానీ ఆఫర్‌తో జనం తోపులాట

హనుమకొండలోని కే క్రాస్ రోడ్డు వద్ద ఒక కొత్త రెస్టారెంట్ ఫ్రీ చికెన్ బిర్యానీ ఆఫర్ ప్రకటించింది. ప్రచారం కోసం ఈ ఆఫర్ పెట్టిన రెస్టారెంట్, మొత్తం 300 బిర్యానీ ప్యాకెట్లను ఉచితంగా అందించింది.

ఈ ఆఫర్ వినగానే ఉదయం నుంచే స్థానికులు భారీ సంఖ్యలో రెస్టారెంట్ వద్దకు చేరుకున్నారు. ఆడ, మగ తేడా లేకుండా వందలాది మంది బిర్యానీ కోసం ఎదురుచూశారు. ప్యాకెట్లు పంచడం మొదలు కాగానే, జనం తోపులాట ప్రారంభమైంది. బిర్యానీ దొరికిన వారు సంతోషించగా, దొరకని వారిలో కొందరు అసంతృప్తి వ్యక్తం చేస్తూ, తిట్లు విసురుకున్నారు.

రెస్టారెంట్ ఈ ప్రమోషన్తో జనాల దృష్టిని ఆకర్షించేందుకు ప్రయత్నించింది. ఈ ఉచిత బిర్యానీ ఆఫర్ కోసం రెస్టారెంట్ దాదాపు రూ.10,000 నుంచి రూ.30,000 వరకు ఖర్చు చేసి ఉండవచ్చని అంచనా. కొత్త వ్యాపారాల ప్రమోషన్ కోసం ఇలాంటి ఆఫర్లు చేయడం సాధారణమే అయినా, సరుకు తక్కువగా ఉండటంతో కొంతమందిలో అసంతృప్తి నెలకొంది.