ప్లాస్టిక్ గుడ్లు, రంగు పుచ్చకాయల వదంతులు నిజం కాదు: FSSAI స్పష్టీకరణ

సోషల్ మీడియాలో ఇటీవల ప్లాస్టిక్ గుడ్లు, రంగు ఇంజెక్ట్ చేసిన పుచ్చకాయల వీడియోలు విపరీతంగా సంచలనం సృష్టించాయి. ఈ వీడియోలను చూసి చాలా మంది ఆందోళన చెందుతున్నారు. అయితే, భారత ఆహార భద్రతా ప్రమాణాల సంస్థ (FSSAI) వీటిపై అధికారిక స్పష్టత ఇచ్చింది. ఈ వ్యాప్తిలో ఉన్న వాదనలన్నీ నిరాధారమైనవని, వాటికి శాస్త్రీయ ఆధారాలు లేవని FSSAI స్పష్టం చేసింది.

ప్లాస్టిక్ గుడ్ల వీడియోలపై FSSAI చెబుతోంది: భారతదేశ ఆహార సరఫరా వ్యవస్థలో ఎక్కడా కృత్రిమమైనా లేదా ప్లాస్టిక్ గుడ్లు చలామణిలో లేవు. వైరల్ వీడియోల్లో కనిపించే విధంగా గుడ్డు సొన విరిగిపోవడం వెనుక ప్లాస్టిక్ కారణం కాదు. కేవలం గుడ్డు పాతది కావడం వల్ల లోపలి తేమ తగ్గి సొన పెళుసుగా మారి సులువుగా విరిగిపోతుంది. ఇది సహజ ప్రక్రియే తప్ప ల్యాబ్ లో తయారైన ప్లాస్టిక్ కాదు. ఇంట్లో గుడ్డు తాజాదో కాదో తెలుసుకోవడానికి FSSAI ఒక సులువైన నీటి పరీక్ష సూచించింది. చల్లటి నీటిలో గుడ్డు ఉంచినప్పుడు అది మునిగితే తాజాదని, తేలితే పాతదని అర్థం. తేలిన గుడ్డును వాడకపోవడమే మంచిది; కానీ అది ప్లాస్టిక్ గుడ్డు కాదు.

పుచ్చకాయలకు రంగు ఇంజెక్షన్ వదంతి గురించి కూడా FSSAI స్పష్టత ఇచ్చింది. వ్యాపారులు సిరంజీలతో ఎరుపు రంగును పుచ్చకాయల్లోకి పంపుతున్నారనేది అవాస్తవమని తేల్చింది. లాజికల్‌గా ఆలోచిస్తే, వేలాది పుచ్చకాయలకు ఒక్కొక్కదానికి ఇంజెక్షన్ ఇవ్వడం చాలా శ్రమతో కూడినది, ఖర్చుతో కూడుకున్నది. ఫిజిక్స్ ప్రకారం, గట్టి పండులోకి రంగును సూదితో పంపితే ఆ రంగు లోపల అంతటా సమానంగా వ్యాపించదు. సూది గుచ్చిన చోట మాత్రమే ముదురు మచ్చ ఏర్పడుతుంది. అదనంగా, సూది గుచ్చడం వల్ల పండులోనికి బ్యాక్టీరియా చేరి కొన్ని గంటల్లోనే కుళ్ళిపోతుంది. అలాంటి పండ్లను మార్కెట్‌కు తెచ్చి అమ్మడం వ్యాపారికి సాధ్యం కాదు.

కాబట్టి, సోషల్ మీడియాలో వచ్చే అన్వెరిఫైడ్ వీడియోలను నమ్మి అనవసరంగా ఆందోళన చెందొద్దని, సైన్స్‌ను అర్థం చేసుకోవాలని FSSAI సూచిస్తోంది. గుడ్లు, పుచ్చకాయలను ప్రశాంతంగా ఎంజాయ్ చేయొచ్చు.