శ్రీకాకుళం శాంతినగర్‌లో గాంధీ మందిరంలో నిత్య పూజలు, 70 స్మృతి విగ్రహాలు

శ్రీకాకుళం శాంతినగర్‌లో మహాత్మా గాంధీకి నిర్మించిన మందిరంలో నిత్యం పూజలు నిర్వహిస్తున్నారు. 2021లో ఈ గాంధీ మందిరాన్ని నిర్మించారు. మందిరంలో గాంధీ నిలువెత్తు విగ్రహం ఉంది.

ఇక్కడ రోజు ఉదయం, సాయంత్రం ధూప దీపాలతో ఆరాధన చేస్తారు. ఉదయం వందేమాతరం, దేశభక్తి గీతాలు ఆలపిస్తారు. సాయంత్రం దేశభక్తి గీతాలు, భగవద్గీత శ్లోకాల అనంతరం జనగణమనతో ఆరాధన ముగుస్తుంది. ప్రతి శనివారం గాంధీ శతనామావళి పఠిస్తారు. గాంధీ జయంతి, వర్ధంతి సందర్భాల్లో ప్రత్యేక కార్యక్రమాలు నిర్వహిస్తారు.

మందిరం చుట్టూ ఉన్న పార్కును స్వాతంత్ర సమరయోధుల స్మృతివనంగా పిలుస్తారు. ఇక్కడ గోరా, రవీంద్రనాథ్ ఠాగూర్, వావిలాల గోపాలకృష్ణ, లాల్ బాల్ పాల్ సహా సంఘ సంస్కర్తలు, స్వాతంత్ర సమరయోధుల 70 విగ్రహాలు ఉన్నాయి. జాతీయ జెండా రూపకల్పనకు 100 ఏళ్లు పూర్తయిన సందర్భంగా ఏర్పాటు చేసిన 105 అడుగుల ఎత్తైన జాతీయ జెండా కూడా ఇక్కడ ఎగురుతూ ఉంటుంది.

ఇక్కడ ఇటీవల సగం రైతు, సగం సైనికుడు ఉన్న కొత్త విగ్రహాన్ని ఏర్పాటు చేశారు. రైతు, సైనికుడు ఇద్దరినీ దేశ రక్షకులుగా చూపే ఈ విగ్రహం స్మృతివనంలో కొలువుదీరింది. ప్రతిరోజు ఎవరో ఒక స్వాతంత్ర సమరయోధుని జయంతి లేదా వర్ధంతి ఉంటుంది. దీంతో ఇక్కడ పలు కార్యక్రమాలు జరుగుతుంటాయి.