ఇరాన్ యుద్ధంతో అమెరికా శక్తి పతనం; భారత్‌-చైనా సంబంధాలు మెరుగుపడతాయి: జార్జ్ యియో

ఇరాన్‌పై అమెరికా-ఇజ్రాయెల్ యుద్ధం ప్రపంచ దేశాలకు ఒక పాఠమని సింగపూర్ మాజీ విదేశాంగ మంత్రి జార్జ్ యియో అన్నారు. ANI కి ఇచ్చిన ఇంటర్వ్యూలో ఆయన మాట్లాడుతూ, ఇరాన్ నెలల తరబడి రెండు దేశాల దాడులను ఎదుర్కోవడం అమెరికా సైనిక శక్తి పరిమితిని తేటతెల్లం చేసిందని పేర్కొన్నారు. అఫ్ఘానిస్తాన్, వియత్నాం యుద్ధాల్లో లాగే ట్రంప్ ప్రభుత్వం ఈ యుద్ధంలోనూ చిక్కుకుపోయే ప్రమాదం ఉందని హెచ్చరించారు. మధ్యప్రాచ్యంలో అమెరికా ఆధిపత్యం తగ్గిపోతోందని, ఇప్పుడు ప్రతి ప్రాంతం తన సమతౌల్యాన్ని వెతుక్కోవాల్సి వస్తోందని వివరించారు.

చైనా గురించి యియో చెప్పిన వ్యాఖ్యలు భారత్ సహా ఆసియా దేశాలకు కీలకం. చైనా విస్తరణవాద శక్తి కాదని, చారిత్రకంగా ఆ దేశం ఎప్పుడూ బహుళ ధ్రువ ప్రపంచంలోనే ఉన్నదని ఆయన అన్నారు. భారత్‌-చైనా మధ్య గల్వాన్ తర్వాత వచ్చిన వివాదం క్రమంగా సద్దుమణిగి, సంబంధాలు మెరుగుపడుతున్నాయని అభిప్రాయపడ్డారు. కైలాస యాత్ర పునఃప్రారంభం, వ్యాపార మార్గాలు తెరుచుకోవడం, మరిన్ని విమానాలు నడపడం వంటి పరిణామాలు దీనికి నిదర్శనమన్నారు. ‘పంచశీల్‌’ స్ఫూర్తితోనే భారత్‌-చైనా ముందుకెళ్లాలని సూచించారు.

టిబెట్ ఆధ్యాత్మిక నాయకుడు దలైలామా 15వ పునర్జన్మపైనా యియో మాట్లాడారు. చైనాలో నియమితులయ్యే దలైలామాకే అధికారిక గుర్తింపు ఉంటుందని, భారత్‌లోని టిబెటన్ సంస్థలు ఎంపిక చేసే వ్యక్తికి కొంత గౌరవం దక్కినా అది సమానం కాదని చెప్పారు. చైనా ఇప్పటికే పంచెన్ లామాను గోల్డెన్ అర్న్ ప్రక్రియ ద్వారా నియమించిందని, దీనికి చారిత్రక చట్టబద్ధత ఉందన్నారు.

టెక్నాలజీ విషయంలో మాట్లాడుతూ, భారత్ AI రంగంలో సార్వభౌమత్వం కోసం ఓపెన్ సోర్స్ మోడళ్లపై దృష్టి పెట్టాలని యియో సలహా ఇచ్చారు. అమెరికా క్లోజ్డ్ సిస్టమ్‌లపై ఆధారపడితే డేటా నష్టపోయే అవకాశం ఉందన్నారు. అలాగే భారత విదేశాంగ మంత్రిత్వశాఖను విస్తరించాల్సిన అవసరం ఉందని, చైనాతో పోలిస్తే ఇక్కడి దౌత్యవేత్తల సంఖ్య తక్కువని అభిప్రాయపడ్డారు.