జ్ఞానేశ్వరి మిస్సింగ్ కేసు: అదృశ్యమైన రోజు గ్రామంలో కనిపించిన కారుపై కుటుంబం అనుమానాలు

చిన్నారి జ్ఞానేశ్వరి అదృశ్యమైన రోజు గ్రామంలో రికార్డయిన ఓ కారు దృశ్యాలు కొత్త అనుమానాలకు దారితీశాయి. ఇటీవల నర్సీపట్నం సమీపంలో ఆమె తాతయ్యను ఢీ కొట్టింది ఇదే కారని బంధువులు చెబుతున్నారు. దీంతో ఈ మిస్సింగ్ కేసుతో కారుకు సంబంధం ఉందేమోనని కుటుంబం అనుమానం వ్యక్తం చేసింది.

ఏసీహెచ్ అగ్రహారంలో నెల రోజుల క్రితం చిన్నారి కనిపించకుండా పోయింది. ఆ రోజు రాత్రి నుంచే పోలీసులు గాలింపు చర్యలు చేపట్టారు. జాగిలాలు, ఎన్డీఆర్ఎఫ్, అటవీ శాఖ బృందాలు, హనుమాన్ బృందాలు శోధించాయి. కొండ తోట ప్రాంతాన్ని థర్మల్ డ్రోన్లతో పరిశీలించారు. ఏడు మొబైల్ టవర్ల పరిధిలో వందల కాల్‌లను, సీసీ కెమెరాలను విశ్లేషించారు.

ఇప్పటివరకు చిన్నారి ఆచూకీ లభించలేదు. కుటుంబం తీవ్రంగా కుంగిపోయింది. ఈ నేపథ్యంలో తాజాగా అదృశ్యమైన రోజు గ్రామంలో తిరిగిన కారు యొక్క దృశ్యాలు వెలుగులోకి రావడంతో బంధువులు అనుమానాలు వ్యక్తం చేశారు. అదే కారు ఇటీవల నర్సీపట్నం దగ్గర తాతయ్యను ఢీ కొట్టిందని, ఈ కారుపై సమగ్ర దర్యాప్తు చేయాలని పోలీసుల్ని కోరుతున్నామని కుటుంబ సభ్యులు తెలిపారు.

పోలీసులు అన్ని కోణాల్లో దర్యాప్తు కొనసాగిస్తున్నారు. మొబైల్ టవర్ డేటా, కాల్ డేటా విశ్లేషణ, డ్రోన్ సర్వేలు, ట్రాప్ కెమెరాలు, ఆర్ఎఫ్ఐడి పద్ధతులను ఉపయోగిస్తున్నారు. నేల బోరుబావులు, చెరువులు కూడా వెతికారు. ఎటువంటి ఆధారమూ దొరకలేదు. కారుతో సహా అన్ని కోణాల్లో దర్యాప్తు చేస్తామని అధికారులు తెలిపారు.