గోల్కొండ బోనాల వేడుకల్లో భక్తుల రద్దీ, రెండో రోజు ఆదివారం అమ్మవారికి బోనం సమర్పణ

హైదరాబాద్ లోని గోల్కొండ కోటలో జగదాంబిక మహంకాళి అమ్మవారికి బోనాల పండుగ రెండో రోజు ఆదివారం సందడిగా కొనసాగింది. తెల్లవారుజాము నుంచే భక్తులు అధిక సంఖ్యలో తరలివచ్చి బోనం సమర్పించారు. జూలై 16న ప్రారంభమైన బోనాల జాతర ఆగస్టు 13 వరకు జరుగనుంది.

భక్తుల సౌకర్యం కోసం ప్రభుత్వం విస్తృత ఏర్పాట్లు చేసింది. ప్రత్యేక క్యూ లైన్లు, ట్రాఫిక్ నియంత్రణ, ఆరు మెడికల్ క్యాంపులు, ఆరు వాటర్ క్యాంపులు, అంబులెన్స్ ఏర్పాటు చేశారు. సీసీ కెమెరాలతో కమాండ్ కంట్రోల్ నుంచి నిరంతర పర్యవేక్షణ కొనసాగింది. భక్తుల రవాణా కోసం ప్రత్యేక ఆర్టీసీ బస్సులను కేటాయించారు. గుడి ఉన్న కోటపై దాదాపు 400 మెట్లు ఉండగా, ఎంట్రీ, ఎగ్జిట్ వేర్వేరుగా నిర్వహించారు.

ఉదయం నుంచి భక్తుల సంఖ్య పెరగడంతో కోట పరిసరాలు సందడిగా మారాయి. కుటుంబ సమేతంగా వచ్చిన భక్తులు కోట ప్రాంగణంలోనే బోనం తయారు చేసుకుంటూ అమ్మవారికి నివేదించారు. సాంప్రదాయ దుస్తుల్లో మహిళలు, పలువురు యువత ఉత్సాహంగా పాల్గొన్నారు. కూకట్‌పల్లి నుంచి వచ్చిన ఓ యువతి తొలిసారి బోనాలను వీక్షించిన అనుభూతిని పంచుకున్నారు.

బోనాల జాతరలో భాగంగా శివసత్తులు, జోగినీలు, పోతురాజుల విన్యాసాలు సాయంత్రం వరకు జరిగాయి. పోలీస్ బందోబస్తు, జీహెచ్ఎంసీ సిబ్బంది నిరంతరం పరిశుభ్రత పాటించారు.