హైదరాబాద్‌లో గోల్కొండ జగదాంబిక అమ్మవారి బోనాలు ఘనంగా జరుగుతున్నాయి

హైదరాబాద్‌లోని గోల్కొండ కోటలో జగదాంబిక అమ్మవారి బోనాలు ఘనంగా కొనసాగుతున్నాయి. గురువారం తొలి బోనం సమర్పించిన తర్వాత ఆదివారాల్లో భక్తులు పెద్ద సంఖ్యలో బోనాలు సమర్పిస్తున్నారు.

ప్రతి గురువారం, ప్రతి ఆదివారం నెల రోజుల పాటు ఈ బోనాలు జరగడం ఇక్కడి ప్రత్యేకత. ఇతర ప్రాంతాల్లో కాకుండా ఇక్కడ నెల రోజుల పాటు వారానికి రెండు రోజులు జరుగుతాయి. ప్రభుత్వం భక్తులకు తగిన ఏర్పాట్లు చేసింది. గురువారం, ఆదివారం రోజు ప్రజలకు గోల్కొండ కోటకు ఉచిత ప్రవేశం కల్పిస్తున్నారు.

నగరంలోని వివిధ ప్రాంతాల నుంచి వచ్చే భక్తులు నాగమ్మ ఆలయం వద్ద బోనాలు ఎక్కిస్తున్నారు. చాలా మంది తమ కుటుంబాలతో వచ్చి ఇక్కడే వంటలు చేసి, అమ్మవారికి నైవేద్యం సమర్పించి, భోజనం చేస్తున్నారు. మేకలను బలిచ్చి మొక్కులు చెల్లించుకోవడం కూడా సాంప్రదాయంగా కొనసాగుతోంది. భక్తులు ఉదయం నుంచే బారులు తీరారు.

ఈసారి ప్రత్యేకంగా శ్రీ మహంకాళీ అమ్మవారికి బంగారు కవచం, బంగారు చీరను అలంకరించారు. ఈ సంప్రదాయం కాకతీయుల కాలం నుంచి కొనసాగుతున్నట్టు చెబుతారు. 400 మెట్లు ఎక్కి పైన ఉన్న అమ్మవారిని దర్శించుకోలేని వారు కింద నాగమ్మ ఆలయం వద్దే బోనం సమర్పించుకుంటారు.

నెల రోజుల పాటు జరిగే ఈ బోనాల ముగింపు తొమ్మిది పూజల తర్వాత జరుగుతుంది. సాధారణంగా పర్యాటకులతో రద్దీగా ఉండే గోల్కొండ కోట ఇప్పుడు పూర్తిగా ఆధ్యాత్మిక శోభను సంతరించుకుంది.