హైదరాబాద్‌లో గ్రీన్ SM ఎలక్ట్రిక్ క్యాబ్ సేవలు.. ఓలా, ఉబర్‌కు పోటీ

వియత్నాం కంపెనీ గ్రీన్ SM హైదరాబాద్‌లో ఎలక్ట్రిక్ క్యాబ్ సేవలు ప్రారంభించేందుకు సిద్ధమవుతోంది. ఓలా, ఉబర్‌లకు ఇది నేరుగా పోటీగా మారనుంది.

ఇప్పటికే నగర రోడ్లపై ఈ కంపెనీ వాహనాలు కనిపిస్తున్నాయి. అయితే పూర్తి స్థాయిలో సేవలు ఎప్పటి నుంచి ప్రారంభమవుతాయనే దానిపై అధికారిక ప్రకటన రావాల్సి ఉంది.

గ్రీన్ SM 2023లో వియత్నాంలో ప్రారంభమైంది. మూడేళ్లలోనే ఆసియా నుంచి యూరోప్ వరకు తన కార్యకలాపాలను విస్తరించింది. భారతదేశంలో ఢిల్లీ NCR లో సేవలు ప్రారంభించి, ఇప్పుడు హైదరాబాద్ మార్కెట్‌పై దృష్టి పెట్టింది.

ఓలా, ఉబర్‌లా కాకుండా గ్రీన్ SM సొంత ఎలక్ట్రిక్ వాహనాలను నిర్వహిస్తోంది. డ్రైవర్లను నియమించి, శిక్షణ ఇచ్చి సేవలు అందిస్తోంది. ఈ కార్లు VinFast ఎలక్ట్రిక్ కార్లు. ప్రయాణికులు కారు పనితీరు తెలుసుకుంటే, భవిష్యత్తులో అదే బ్రాండ్ కారు కొనుగోలు చేసే అవకాశం ఉంటుందని కంపెనీ భావిస్తోంది.

హైదరాబాద్‌లో కిలోమీటర్‌కు ₹9కే ప్రయాణం అనే ప్రచారం సాగుతోంది. అయితే ₹9 అనేది స్థిర ఛార్జీ కాదు. కనీస ఛార్జీలు, డిస్కౌంట్లు ఉంటాయి. ఖచ్చితమైన ధరలపై కంపెనీ అధికారిక స్పష్టత ఇవ్వాల్సి ఉంది.

డ్రైవర్లకు నెలకు ₹35,000 వరకు ఆదాయం ఇస్తామని కంపెనీ చెబుతోంది. ఇది ఫిక్స్డ్ శాలరీయా, లేక రైడ్లు పూర్తి చేయడం, కస్టమర్ రేటింగ్ వంటి ప్రమాణాలపై ఆధారపడి ఉంటుందా అనేది ఇంకా స్పష్టం కాలేదు.

తక్కువ ధరలు, ఉద్యోగ అవకాశాలు, ఎలక్ట్రిక్ వాహనాల ప్రోత్సాహం ఈ సంస్థకు అనుకూల అంశాలు. ఓలా, ఉబర్ ఆధిపత్యం ఉన్న మార్కెట్‌లో గ్రీన్ SM ఎంతవరకు నిలదొక్కుకుంటుందనేది రాబోయే రోజుల్లో తెలుస్తుంది.