గుంటూరు మిర్చి ఎగుమతి: పురుగు మందుల అవశేషాలతో మూడు కంటైనర్లను చైనా తిరిగి పంపింది

ప్రపంచ ప్రసిద్ధి చెందిన గుంటూరు మిర్చిలో పురుగు మందుల అవశేషాలు కలకలం రేపుతున్నాయి. ఈ ఏడాది చైనాకు ఎగుమతైన మూడు కంటైనర్ల మిర్చిని అక్కడి అధికారులు వెనక్కి తిప్పి పంపారు. మిథోమిల్ అనే పురుగు మందు అవశేషాలు ఎక్కువగా ఉన్నట్లు చైనా రిపోర్ట్ ఇచ్చింది.

ఇప్పటి వరకు చైనాకు మొత్తం 9,000 కంటైనర్ల ఎగుమతి జరగగా, వాటిలో కేవలం మూడు మాత్రమే తిరిగి వచ్చాయని ఎగుమతిదారులు తెలిపారు. గత ఏడాది 60 కంటైనర్ల వరకు వెనక్కి వచ్చాయని, అయితే మొత్తం ఎగుమతులు వెనక్కి వస్తున్నాయనే ప్రచారం తప్పుడు అభిప్రాయం కలిగిస్తోందని గుంటూరు మిర్చి మార్కెట్ యార్డ్ చైర్మన్ కుర్ర అప్పారావు అన్నారు. రైతులు అధిక మోతాదులో పురుగు మందులు వాడుతున్నారని, అవగాహన కార్యక్రమాలు చేపడుతున్నామని ఆయన చెప్పారు.

మిర్చి సాగులో పురుగు మందుల వినియోగం తగ్గించాలని వ్యవసాయ శాస్త్రవేత్తలు హెచ్చరిస్తున్నారు. సీడ్ సర్టిఫికేషన్ సంస్థ డైరెక్టర్ సతీష్ మాట్లాడుతూ, ఆర్గానిక్ వ్యవసాయ పద్ధతులు పాటిస్తే ప్రపంచంలోని అనేక దేశాలు మంచి ధరకు మిర్చిని దిగుమతి చేసుకుంటాయని వివరించారు. GAP సర్టిఫికెట్ ఉంటే 170 దేశాలకు ఎగుమతి చేయవచ్చని ఆయన సూచించారు.

ఇంటిగ్రేటెడ్ పెస్ట్ మేనేజ్మెంట్ (IPM) విధానం ద్వారా రసాయనిక మందుల వాడకాన్ని గణనీయంగా తగ్గించవచ్చని నిపుణులు చెప్తున్నారు. కొన్ని ప్రమాదకరమైన పురుగు మందులను నిషేధించాలని ఎగుమతిదారుల సంఘం రాష్ట్ర ప్రభుత్వాన్ని కోరింది. ఈ దిశగా స్పైసెస్ బోర్డు కూడా ప్రయత్నాలు ప్రారంభించినట్లు తెలిసింది. రైతులు దళారులను నమ్మి స్థానికంగా చౌక ధరకు మిర్చి అమ్ముకోవద్దని, నేరుగా మార్కెట్ యార్డుకు తరలించాలని చైర్మన్ విజ్ఞప్తి చేశారు.

గుంటూరు, ప్రకాశం, కృష్ణా జిల్లాల్లో మిర్చి సాగు విస్తారంగా జరుగుతుంది. పురుగు మందుల అవశేషాల భయాందోళనలకు బదులుగా తక్కువ మోతాదులో మందులు వాడేలా అవగాహన కల్పించడంపై అధికారులు దృష్టి పెట్టారు.