హనుమకొండలో హనుమాన్ విగ్రహం ధ్వంసం — నిరసనలు, పోలీసుల దర్యాప్తు

హనుమకొండ శివారులోని న్యూ సాయంపేట వద్ద ఒక కొండపై ఉన్న హనుమాన్ విగ్రహాన్ని అజ్ఞాత దుండగులు ధ్వంసం చేశారు. విగ్రహాన్ని మూడు ముక్కలుగా పగలగొట్టారు. విగ్రహం ముందు భక్తులకోసం నిర్మించిన రేకుల షెడ్డును కూడా పడగొట్టారు.

ఈ సంఘటన రాత్రి రెండు గంటలకు జరిగినట్లు తెలుస్తోంది. విషయం తెలుసుకున్న భక్తులు పెద్ద సంఖ్యలో ఆ ప్రాంతానికి చేరుకున్నారు. హనుమాన్ భక్తులు, బజరంగ్ దల్ కార్యకర్తలు న్యూ సాయంపేట ప్రధాన రహదారిపై నిరసన తెలిపారు.

నిందితులను గుర్తించి కఠిన చర్యలు తీసుకోవాలని ఆందోళనకారులు డిమాండ్ చేశారు. నిందితులను అరెస్టు చేసేంత వరకు నిరసన ఆపమని వారు తెలిపారు. నిరసనకారులను తరలించేందుకు వచ్చిన పోలీసులకు, ఆందోళనకారులకు మధ్య ఘర్షణ చోటుచేసుకుంది.

విగ్రహం ధ్వంసానికి కారణమేమిటో, ఇందుకు బాధ్యులెవరో పోలీసులు దర్యాప్తు చేస్తున్నారు.