బీజేపీతో పొత్తు లేదు, బీఆర్ఎస్ ఒంటరిగా పోటీ: హరీష్ రావు

BRS నేత హరీష్ రావు బీజేపీతో పొత్తు ఉండదని స్పష్టం చేశారు. భవిష్యత్తులో కూడా బీజేపీతో అలయన్స్ అవసరం లేదని, BRS ఒంటరిగానే ఎన్నికల్లో పోటీ చేస్తుందని ఆయన పునరుద్ఘాటించారు.

తెలంగాణలో బీజేపీ సువేందు అధికారి లేదా షిండే లాంటి వారిని తీసుకొచ్చే అవకాశం ఉందన్న ఊహాగానాలపై ఆయన స్పందించారు. తన పేరు కూడా అలాంటి చర్చల్లో వినిపిస్తోందని, కానీ తాను బీజేపీలో చేరే ప్రసక్తే లేదని హరీష్ రావు చెప్పారు. తాను కేసీఆర్ తోనే ఉంటానని, పార్టీ మారేది లేదని ఖరాఖండీగా చెప్పారు.

ముఖ్యమంత్రి రేవంత్ రెడ్డి తాను 2034 వరకు ముఖ్యమంత్రిగా ఉంటానని, BRS లో ఐక్యత లేదని చేసిన వ్యాఖ్యలపై హరీష్ రావు విమర్శించారు. BRS లో ఐక్యత లేదన్నది రేవంత్ రెడ్డి కల మాత్రమేనని, తనకు, కేటీఆర్‌కు ఎలాంటి విభేదాలు లేవని ఆయన అన్నారు. ఇద్దరూ సమన్వయంతో పని చేస్తున్నామని స్పష్టం చేశారు.

రాబోయే ఎన్నికలకు పార్టీని బలోపేతం చేస్తామని, నియోజకవర్గాల పునర్విభజన, రిజర్వేషన్లపై సమయం వచ్చినపుడు నిర్ణయాలు తీసుకుంటామని హరీష్ రావు తెలిపారు. పార్టీ కార్యవర్గాన్ని పటిష్టం చేసి, శిక్షణ ఇచ్చి ఎన్నికలకు సిద్ధంగా ఉంటామన్నారు.