గుండ్రేవుల రిజర్వాయర్‌తో తెలంగాణకు నష్టం: హరీష్ రావు హెచ్చరిక

తెలంగాణలో గుండ్రేవుల రిజర్వాయర్ నిర్మాణంపై బీఆర్ఎస్ నేత, మాజీ మంత్రి హరీష్ రావు తీవ్ర ఆందోళన వ్యక్తం చేశారు. ఆంధ్రప్రదేశ్ ప్రభుత్వం తుంగభద్ర నదిపై నిర్మిస్తున్న ఈ ప్రాజెక్టు వల్ల తెలంగాణకు తీవ్ర నష్టం జరుగుతుందని హెచ్చరించారు.

హోస్పేటలో జరుగుతున్న తుంగభద్ర డ్యామ్ నూతన గేట్ల ప్రారంభోత్సవం సందర్భంగా ఆంధ్రప్రదేశ్ సీఎం చంద్రబాబు నాయుడు, తెలంగాణ సీఎం రేవంత్ రెడ్డి, కర్ణాటక సీఎం సిద్ధరామయ్యలు సమావేశమవుతున్నారు. ఈ నేపథ్యంలో హరీష్ రావు తెలంగాణ సీఎం రేవంత్ రెడ్డికి లేఖ రాశారు. తెలంగాణ నీటి హక్కులను పక్క రాష్ట్రాలకు తాకట్టు పెట్టవద్దని కోరారు.

గుండ్రేవుల రిజర్వాయర్ పూర్తయితే మహబూబ్నగర్ జిల్లాలోని ఆరు గ్రామాలు, వెయ్యి ఎకరాల అటవీ భూమి, రెండు వేల ఎకరాల పంట పొలాలు మునిగిపోతాయని హరీష్ రావు తెలిపారు. ఈ ప్రాజెక్టును కేసీఆర్ హయాంలో నిలిపివేశారు. ప్రస్తుత సర్కారు ఆంధ్రప్రదేశ్ కు సహకరిస్తున్నదని బీఆర్ఎస్ నేతలు ఆరోపిస్తున్నారు.

హరీష్ రావు లేఖలో, ఈ ప్రాజెక్టు ఆర్డీఎస్, తుమ్మిల భీమ ప్రాజెక్టుల భవిష్యత్తును ప్రశ్నార్థకంగా మారుస్తుందని హెచ్చరించారు. తెలంగాణ జల హక్కుల కోసం బీఆర్ఎస్ అవిశ్రాంత పోరాటం చేస్తుందని లేఖలో పేర్కొన్నారు. ఈ వ్యవహారంపై రేవంత్ రెడ్డి ప్రభుత్వం స్పందించాల్సి ఉంది.