TG20 లీగ్‌కు 8 ఫ్రాంచైజీలు ఖరారు — జూన్ 20 నుంచి హైదరాబాద్‌లో లీగ్

హైదరాబాద్ క్రికెట్ అసోసియేషన్ (HCA) నిర్వహించిన TG20 లీగ్ ఫ్రాంచైజీ వేలం శనివారం హైదరాబాద్‌లో జరిగింది. మొత్తం ఎనిమిది జట్ల కోసం 13 సంస్థలు పోటీ పడ్డాయి.

హైదరాబాద్ ఫ్రాంచైజీని ₹7.5 కోట్లతో ఉషోదయ ఎంటర్‌ప్రైజెస్ ప్రైవేట్ లిమిటెడ్ దక్కించుకుంది. ఇది వేలంలో అత్యధిక బిడ్. రంగారెడ్డి ఫ్రాంచైజీని ₹7.2 కోట్లతో MS బూరుగు ఇన్‌ఫ్రా, వరంగల్ ఫ్రాంచైజీని ₹6.55 కోట్లతో Bain Global Resources ప్రైవేట్ లిమిటెడ్ కొనుగోలు చేశాయి.

మెదక్ ఫ్రాంచైజీని ₹6.33 కోట్లతో బృంద ఇన్‌ఫ్రా ప్రైవేట్ లిమిటెడ్, నల్గొండ ఫ్రాంచైజీని ₹5.06 కోట్లతో కిషోర్ ఇన్‌ఫ్రాస్ట్రక్చర్స్ ప్రైవేట్ లిమిటెడ్ సొంతం చేసుకున్నాయి. కరీంనగర్ ఫ్రాంచైజీని ₹4.57 కోట్లతో EIPL గ్రూప్ అండ్ తిబరమాల్, మహబూబ్‌నగర్ ఫ్రాంచైజీని ₹4.50 కోట్లతో వీరభద్ర స్టీల్స్, ఖమ్మం ఫ్రాంచైజీని ₹4.44 కోట్లతో అన్వితా గ్రూప్ దక్కించుకున్నాయి.

జూన్ 7న ఆటగాళ్ళ వేలం జరుగుతుంది. ఒక్కో ఫ్రాంచైజీకి ఆటగాళ్ళ కొనుగోలుకు ₹60 లక్షల పరిమితి ఉంటుంది. ఆటగాళ్ళు తమ కనీస ధరను ₹50,000 నుంచి ₹5 లక్షల వరకు నమోదు చేసుకోవచ్చు. తిలక్ వర్మ, మహమ్మద్ సిరాజ్ వేలంలో భాగమయ్యే అవకాశం ఉందని నిర్వాహకులు తెలిపారు.

లీగ్ జూన్ 20 నుంచి జూలై 11 వరకు ఉప్పల్ రాజీవ్ గాంధీ ఇంటర్నేషనల్ స్టేడియంలో జరుగుతుంది. తమిళనాడు ప్రీమియర్ లీగ్ మాజీ CEO ప్రసన్న కణన్‌ను HCA లీగ్ execution head గా నియమించింది. మ్యాచ్‌లను Star Sports Telugu, JioHotstar ద్వారా చూడవచ్చు.