యువతలో గుండెపోటు ముప్పు: కారణాలు, లక్షణాలు, నివారణకు సూచనలు

గుండెపోటు (హార్ట్ ఎటాక్) కేసులు ఇటీవల 30 నుంచి 40 ఏళ్ల వయసు వారిలో గణనీయంగా పెరుగుతున్నాయి. గతంలో 60–70 ఏళ్ల వారిలో ఎక్కువగా కనిపించే ఈ సమస్య ఇప్పుడు యువతలో కూడా సాధారణమవుతోంది. ప్రముఖ కార్డియాలజిస్ట్ డాక్టర్ శ్రవణ్ ఈ విషయాన్ని వివరించారు.

శారీరక శ్రమ తగ్గడం, ప్రాసెస్డ్ ఫుడ్, ఫాస్ట్ ఫుడ్ వినియోగం పెరగడం, ఒత్తిడి, సరైన నిద్ర లేకపోవడం వంటి జీవనశైలి మార్పులు ప్రధాన కారణాలు. అనియంత్రిత షుగర్, బీపీ, ఊబకాయం, ధూమపానం, మద్యపానం కూడా హార్ట్ ఎటాక్ రిస్క్‌ను పెంచుతాయి. కుటుంబంలో గుండె జబ్బుల చరిత్ర ఉన్నవారికి ఈ ప్రమాదం మరింత ఎక్కువ.

గుండెపోటు లక్షణాలు: ఛాతీలో ఎడమవైపు నొప్పి, నడుస్తున్నప్పుడు, మెట్లు ఎక్కేటప్పుడు నొప్పి రావడం, ఆయాసం, గుండె దడ, దవడ నొప్పి, చేయి లాగినట్లు అనిపించడం. కొన్ని సందర్భాల్లో గ్యాస్ట్రిక్ పెయిన్ లాగా కూడా రావచ్చు. తీవ్రమైన ఛాతీ నొప్పి, మెడకు, చేతికి వ్యాపిస్తే వెంటనే వైద్య సహాయం తీసుకోవాలి.

ప్రాథమిక చికిత్సగా సీపీఆర్ (కార్డియో పల్మనరీ రిససిటేషన్) అవసరమైనప్పుడు సరైన పద్ధతిలో ఛాతీపై ఒత్తిడి ఇవ్వడం వల్ల ప్రాణాపాయ స్థితిలో ఉన్న వ్యక్తిని కాపాడవచ్చు. రెండు చేతులు ఇంటర్‌లాక్ చేసి, భుజం నుంచి చేతులు నిటారుగా ఉంచి కంప్రెషన్లు ఇవ్వాలి.

నివారణకు 20 ఏళ్లు దాటిన ప్రతి ఒక్కరూ లిపిడ్ ప్రొఫైల్ చెక్ చేసుకోవాలి. డయాబెటిస్, బీపీ వంటి రిస్క్ ఫ్యాక్టర్స్ ఉంటే 35 ఏళ్ల నుంచి కార్డియాక్ ఎవాల్యుయేషన్ (ఈసీజీ, 2డీ ఎకో, ట్రెడ్‌మిల్ టెస్ట్) చేయించుకోవాలి. ఏ రిస్క్ లేనివారు 40 ఏళ్ల తర్వాత ఈ పరీక్షలు ప్రారంభించవచ్చు.

చికిత్సలో స్టెంటింగ్, యాంజియోప్లాస్టీ వంటి ఆధునిక పద్ధతులు అందుబాటులో ఉన్నాయి. కాల్షియం నిల్వలు ఉండే బ్లాకేజీలను రోటాబులేషన్, లేజర్ టెక్నిక్‌లతో తొలగించి స్టెంట్ అమర్చవచ్చు. హార్ట్ ఎటాక్ నుంచి కోలుకోవడానికి 6 వారాలు పడుతుంది.