తెలంగాణ, ఏపీలో భారీ వర్షాల హెచ్చరిక

తెలంగాణ, ఆంధ్రప్రదేశ్ రాష్ట్రాల్లో వచ్చే ఏడు రోజుల పాటు భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. హైదరాబాద్, అమరావతి వాతావరణ కేంద్రాలు ఈ మేరకు ప్రత్యేక బులెటిన్ విడుదల చేశాయి.

తెలంగాణలో ఆదిలాబాద్, కొమరంభీం, ఆసిఫాబాద్, నిర్మల్, నిజామాబాద్, ఖమ్మం, మహబూబాబాద్, వరంగల్, హనుమకొండ, మెదక్, కామారెడ్డి, మహబూబ్నగర్ జిల్లాలకు హై అలర్ట్ జారీ చేశారు. జూన్ 30 నుంచి జూలై 1 వరకు రాష్ట్రవ్యాప్తంగా, ఆ తర్వాత జూలై 1–2 మధ్య ములుగు, భద్రాద్రి, ఖమ్మం జిల్లాల్లో భారీ వర్షాలు నమోదవుతాయి. జూలై 2–3 తేదీల్లో ఆదిలాబాద్, నిర్మల్ ప్రాంతాలపై ప్రభావం ఎక్కువగా ఉంటుందని, జూలై 3–4 నాటికి నిర్మల్, జగిత్యాల, సిరిసిల్ల, కరీంనగర్, పెద్దపల్లి జిల్లాలు వర్షాలకు గురికానున్నాయని వాతావరణ కేంద్రం తెలిపింది.

ఆంధ్రప్రదేశ్‌లో జూన్ 30 నుంచి జూలై 3 వరకు కోస్తాంధ్ర, రాయలసీమ ప్రాంతాల్లో వర్షాల తీవ్రత పెరుగుతుంది. జూలై 3–4 తేదీల్లో ఒకటి రెండు చోట్ల భారీ వర్షం కురిసే అవకాశం ఉందని, జూలై 5 వరకు వర్షాలు కొనసాగుతాయని అమరావతి వాతావరణ కేంద్రం వెల్లడించింది.

రెండు రాష్ట్రాల్లో గంటకు 30 నుంచి 50 కిలోమీటర్ల వేగంతో ఈదురుగాలులు వీచుతాయని, చెట్లు, విద్యుత్ స్తంభాలు కూలిపోయే ప్రమాదం ఉందని హెచ్చరించారు. లోతట్టు ప్రాంతాల ప్రజలు, వాహనదారులు జాగ్రత్తగా ఉండాలని, రైతులు పంటలు, పశువులను సురక్షిత ప్రాంతాలకు తరలించాలని అధికారులు సూచించారు. వాతావరణ శాఖ అప్‌డేట్‌లను ఎప్పటికప్పుడు గమనిస్తూ ఉండాలన్నారు.