అల్పపీడనం ప్రభావంతో ఏపీలో భారీ వర్షాలు; హోర్డింగుల కింద నిలబడొద్దని విపత్తు నిర్వహణ హెచ్చరిక

వాయువ్య బంగాళాఖాతంలో కొనసాగుతున్న అల్పపీడనం ప్రభావంతో ఆంధ్రప్రదేశ్‌లో పలు ప్రాంతాల్లో భారీ వర్షాలు కురుస్తున్నాయి. అల్లూరి సీతారామరాజు, ఏలూరు జిల్లాల్లో తేలికపాటి నుంచి మోస్తరు వర్షాలు పడుతున్నాయని వాతావరణ శాఖ తెలిపింది.

పల్నాడు జిల్లాలోని కొన్ని చోట్ల పిడుగులతో కూడిన వర్షాలు కురిసే అవకాశం ఉంది. ప్రకాశం, నెల్లూరు, చిత్తూరు, తిరుపతి, అన్నమయ్య, కడప, కర్నూలు, నంద్యాల జిల్లాల్లో తేలికపాటి వర్షాలు కురిసే అవకాశం ఉంది. బాపట్ల, మార్కాపురం ప్రాంతాల్లోనూ తేలికపాటి జల్లులు పడొచ్చని వాతావరణ శాఖ పేర్కొంది.

ఈ నేపథ్యంలో విపత్తు నిర్వహణ సంస్థ ప్రజలను అప్రమత్తం చేసింది. వర్షం కురిసే సమయంలో బహిరంగ ప్రదేశాల్లో పనిచేసే రైతులు, వ్యవసాయ కూలీలు, పశువుల కాపరులు సురక్షిత ప్రాంతాలకు వెళ్లాలని సూచించింది. హోర్డింగులు, చెట్లు, విద్యుత్ స్తంభాలు, ట్రాన్స్‌ఫార్మర్ల సమీపంలో ఆశ్రయం పొందవద్దని హెచ్చరించింది.

పోలవరం (ఏలూరు జిల్లా) ప్రాంతంలో భారీ వర్షానికి కొండవాగులు పొంగి కుత్తూరు, చింతకొయ్య, బొందగుంట గిరిజన గ్రామాలకు రాకపోకలు నిలిచిపోయాయి. ఈ గ్రామాల్లో విద్యుత్ సరఫరా నిలిచిపోవడంతో ప్రజలు అంధకారంలో ఉన్నారు. కోస్తా జిల్లాల తీరం వెంబడి గంటకు 40-50 కి.మీ. వేగంతో ఈదురుగాలులు వీచే అవకాశం ఉన్నందున ప్రజలు అప్రమత్తంగా ఉండాలని అధికారులు కోరారు.