దేశంలోని పలు రాష్ట్రాల్లో భారీ వర్షాలు; ఈశాన్యంలో వరదలతో ముగ్గురు గల్లంతు, బ్రిడ్జీలు దెబ్బతిన్నాయి

నైరుతి రుతుపవనాలు దేశమంతటా విస్తరించడంతో అనేక రాష్ట్రాల్లో భారీ వర్షాలు కురుస్తున్నాయి. అరుణాచల్ ప్రదేశ్, సిక్కిం, అసోంలలో కుండపోత వానలు పడి వరదలు సంభవించాయి. అరుణాచల్‌లో ముగ్గురు గల్లంతు కాగా, ఎన్డీఆర్ఎఫ్ బృందాలు సహాయక చర్యలు చేపట్టాయి.

అరుణాచల్ ప్రదేశ్‌లోని కేఈ పన్యారు జిల్లాలో ఆకస్మిక వరదలు రావడంతో నిప్కో కాలనీ ముంపునకు గురైంది. ఈ వరదల్లో ముగ్గురు వ్యక్తులు గల్లంతయ్యారు. పలు ప్రాంతాల్లో కొండచరియలు విరిగిపడటంతో రహదారులు మూసుకుపోయాయి. నార్త్ సిక్కింలో కూడా భారీ వర్షాలు కురవడంతో ఫికోలా నదిపై ఉన్న బెలీ బ్రిడ్జి కొట్టుకుపోయింది. ఫీడాంగ్ నుంచి సంకలాంగ్ వరకు రాకపోకలు నిలిచిపోయాయి.

అస్సాంలో దేమాజి ప్రాంతంలో కేమీ నది ఉప్పొంగి ప్రవహించడంతో 300 మీటర్ల ఇనుప వంతెన కొట్టుకుపోయింది. కేమే పురాణ జలోం నుంచి జోనై సదర్‌కు కనెక్టివిటీ పూర్తిగా తెగిపోయింది. స్థానికులు ఈ వరద ఇంతకు ముందెన్నడూ లేదని, ఏడాది క్రితం నిర్మించిన ఈ వంతెన కొట్టుకుపోతుందని ఊహించలేదని చెప్పారు. శాశ్వత కాంక్రీట్ వంతెన నిర్మించాలని కోరుతున్నారు.

జమ్మూ కాశ్మీర్‌లో రియాసి జిల్లాలోని సలాల్ డ్యామ్‌కు వరద పోటెత్తింది. అధికారులు స్పిల్వే గేట్లు తెరిచి నీటిని దిగువకు విడుదల చేస్తూ నదీ పరీవాహక ప్రాంత ప్రజలను అప్రమత్తంగా ఉండాలని సూచించారు. మహారాష్ట్రలో ముంబై, ఠాణే, పాల్ఘర్ ప్రాంతాల్లో భారీ వర్షాలు కురిశాయి. రోడ్లు, లోతట్టు ప్రాంతాలు జలదిగ్బంధంలో చిక్కుకోగా, మాల్షేజ్ ఘాట్‌లో కొండచరియలు విరిగిపడి రాకపోకలు నిలిచిపోయాయి. ఎన్డీఆర్ఎఫ్ బృందాలు గల్లంతైన వారి కోసం గాలింపు చర్యలు కొనసాగిస్తున్నాయి.