హైదరాబాద్‌లో ఏడు నెలల్లో 35,000 క్యాన్సర్ కేసులు: తెలంగాణ ప్రభుత్వం రిజిస్ట్రీ అమలు

హైదరాబాద్‌లోని ప్రభుత్వ, ప్రైవేట్ ఆసుపత్రుల్లో గత ఏడు నెలల్లో సుమారు 35,000 క్యాన్సర్ కేసులు నమోదయ్యాయి. ఈ నేపథ్యంలో తెలంగాణ ప్రభుత్వం క్యాన్సర్ రిజిస్ట్రీ విధానాన్ని అమల్లోకి తెచ్చింది.

కొత్త నిబంధనల ప్రకారం నగరంలోని అన్ని ఆసుపత్రులు, అల్ట్రాసౌండ్ కేంద్రాలు, డయాగ్నోస్టిక్ సెంటర్లు తప్పనిసరిగా డేటా నమోదు చేయాలి. రోగనిర్ధారణ జరిగిన 30 రోజుల్లోగా పోర్టల్‌లో ఈ వివరాలు ఎక్కించాలని ప్రభుత్వం ఆదేశించింది. మెహదీ నవాజ్ జంగ్ (MNJ) ప్రభుత్వ క్యాన్సర్ ఆసుపత్రిని సెంటర్ ఆఫ్ ఎక్సలెన్స్‌గా నిర్ధారించారు.

NIMS, MNJ, బసవతారకం, KIMS, అపోలో, యశోదా, మెడికవర్, AIG ఆసుపత్రుల డేటాను పరిశీలిస్తే పరిస్థితి తీవ్రత అర్థమవుతుంది. మహిళల్లో రొమ్ము, సర్వైకల్ క్యాన్సర్లు ఎక్కువగా నమోదవుతున్నాయి. వాటి తర్వాత హెడ్ అండ్ నెక్ క్యాన్సర్లు ఉన్నాయి. పొగతాగడం, గుట్కా, జర్దా నమలడం వల్ల నోటి క్యాన్సర్లు పెరుగుతున్నాయి.

ప్రస్తుతం అందుబాటులో ఉన్న డేటా ప్రకారం 60 నుంచి 70 శాతం కేసులు వ్యాధి తీవ్రమైన తర్వాతే వైద్యుల వద్దకు వస్తున్నాయి. మొదటి దశలోనే గుర్తిస్తే క్యాన్సర్‌ను పూర్తిగా నయం చేసే అవకాశాలు ఉన్నాయని వైద్యులు చెప్తున్నారు. అవగాహన లోపమే దీనికి ప్రధాన కారణమని ప్రభుత్వ వర్గాలు తెలిపాయి.

ఏ ప్రాంతాల నుంచి ఎక్కువ కేసులు వస్తున్నాయి, ఏ రకమైన క్యాన్సర్లు పెరుగుతున్నాయి అనేది ఈ డేటా ద్వారా తెలుస్తుంది. దీని ఆధారంగా నివారణ చర్యలు, పాలసీల రూపకల్పన, నిధుల కేటాయింపు చేపట్టవచ్చని అధికారులు చెప్తున్నారు. చిన్న లక్షణం కనిపించినా నిర్లక్ష్యం చేయకుండా వెంటనే స్క్రీనింగ్ చేయించుకోవాలని వైద్యులు సూచిస్తున్నారు.