హైదరాబాద్ రెస్టారెంట్లలో ఫుడ్ సేఫ్టీ తనిఖీలు: కుళ్లిన మాంసం, రసాయనాలు స్వాధీనం

హైదరాబాద్ నగరంలో ఫుడ్ సేఫ్టీ టాస్క్ఫోర్స్ అధికారులు ఇటీవల జరిపిన ఆకస్మిక తనిఖీల్లో పలు రెస్టారెంట్లలో ఆరోగ్యానికి హానికరమైన నాణ్యత లేని ఆహార పదార్థాలు గుర్తించారు.

బంజారా హిల్స్, జూబ్లీ హిల్స్, సికింద్రాబాద్, అమీర్పేట ప్రాంతాల్లోని ప్రముఖ రెస్టారెంట్లలో కుళ్లిపోయిన మాంసం, గడువు ముగిసిన సాస్ లు, రసాయనాలతో తయారు చేసిన కృత్రిమ రంగులు స్వాధీనం చేసుకున్నారు. ఈ తనిఖీల్లో రూ.5,000 నుంచి రూ.10,000 వరకు జరిమానాలు విధించారు. కొన్ని సందర్భాల్లో రూ.50,000 వరకు జరిమానా వేశారు. ఆహార నమూనాలను ప్రయోగశాలకు పంపించారు, కానీ రిపోర్టులు రావడానికి నెలల సమయం పడుతుందని అధికారులు తెలిపారు.

చిన్నచిన్న జరిమానాలు విధించి రెస్టారెంట్లను మూసివేయకపోవడంపై ప్రజలు, విమర్శకులు తీవ్ర అసంతృప్తి వ్యక్తం చేస్తున్నారు. చిన్న వ్యాపారులపై కఠిన చర్యలు తీసుకునే అధికారులు పెద్ద రెస్టారెంట్ల విషయంలో మృదువైన వైఖరి అవలంబిస్తున్నారనే విమర్శలు వినిపిస్తున్నాయి.

ఫుడ్ సేఫ్టీ అధికారి మాట్లాడుతూ తమకు రెస్టారెంట్లను సీజ్ చేసే అధికారం లేదని, అయితే చట్టపరమైన చర్యలు తీసుకుంటున్నామని తెలిపారు. ఇప్పటివరకు 97 కేసులు ఎంఎం కోర్టులో నమోదు చేసినట్టు, వాటిలో 3 కేసుల విచారణ పూర్తయిందని వెల్లడించారు. ఫుడ్ సేఫ్టీ కమిషనర్ రహస్యంగా తనిఖీలు నిర్వహించేందుకు నాలుగు ప్రత్యేక టీంలను ఏర్పాటు చేసినట్టు వివరించారు.

ఈ పరిస్థితి నగరవాసుల్లో ఆందోళన రేపింది. ఫుడ్ పాయిజనింగ్ కేసులు పెరిగిన నేపథ్యంలో రెస్టారెంట్లపై కఠిన చర్యలు లేకపోతే ప్రజారోగ్యానికి ప్రమాదం పొంచి ఉంటుందని వైద్య నిపుణులు హెచ్చరిస్తున్నారు. ప్రస్తుతం అధికారులు తనిఖీలను ముమ్మరం చేసినా, దీర్ఘకాలిక పరిష్కారం కోసం సమగ్ర విధానం అవసరమని పౌర సంఘాలు కోరుతున్నాయి.