హైదరాబాద్‌లో రెండో భారత్ సమ్మిట్: 70 దేశాల నుంచి వెయ్యి మందికి పైగా ప్రతినిధులు

హైదరాబాద్‌లో రెండోసారి భారత్ సమ్మిట్ నిర్వహిస్తున్నట్లు డిప్యూటీ సీఎం భట్టి విక్రమార్క తెలిపారు. ఈ సమ్మిట్‌కు 70 దేశాల నుంచి వెయ్యి మందికి పైగా ప్రతినిధులు హాజరు కానున్నారు.

తెలంగాణను అంతర్జాతీయ స్థాయి చర్చల వేదికగా తీర్చిదిద్దడమే ప్రభుత్వ లక్ష్యమని ఆయన అన్నారు. హైదరాబాద్‌ను రాజకీయ, సామాజిక, ఆర్థిక చర్చల కేంద్రంగా మారుస్తామని చెప్పారు.

ప్రజాస్వామ్య సూత్రాలు, అహింస, అలీన విధానాలకు కాంగ్రెస్ ప్రభుత్వం ప్రాధాన్యం ఇస్తుందని భట్టి విక్రమార్క పేర్కొన్నారు. ప్రపంచంలోని అనేక దేశాల్లో విభజన, ద్వేష రాజకీయాలు జరుగుతున్న తరుణంలో ఈ సమ్మిట్ నిర్వహిస్తున్నట్లు ఆయన తెలిపారు. సీఎం రేవంత్ రెడ్డి నాయకత్వంలో లిబరల్, ప్రోగ్రెసివ్ భావాలు కలిగిన ప్రజాస్వామ్యవాదులను ప్రపంచం నలుమూలల నుంచి ఆహ్వానిస్తున్నట్లు ఆయన చెప్పారు.

నెహ్రూ, ఇందిరా గాంధీ, రాజీవ్ గాంధీ చూపిన విదేశాంగ విధానమే ఆదర్శమని కాంగ్రెస్ సీనియర్ నేత సల్మాన్ ఖుర్షిద్ అన్నారు. హైదరాబాద్‌ను భారత్ సమ్మిట్‌కు శాశ్వత వేదికగా మార్చాలని ఆయన సూచించారు.