హైదరాబాద్‌లో IVF ఫెర్టిలిటీ సెంటర్ల అక్రమాలు: 21 సెంటర్లకు నోటీసులు

హైదరాబాద్‌లో IVF ఫెర్టిలిటీ, ART సెంటర్ల అక్రమాలపై దర్యాప్తు కొనసాగుతోందని మల్కాజిగిరి పోలీస్ కమిషనర్ సుమతి తెలిపారు. ఈ కేసులో ఇప్పటికే 21 ఫెర్టిలిటీ సెంటర్లకు నోటీసులు జారీ చేసినట్టు ఆమె చెప్పారు.

అమిత్ శర్మ, దుర్గా ప్రసాద్‌లను అరెస్టు చేసి విచారించినప్పుడు ఈ అక్రమాలు వెలుగులోకి వచ్చాయని సీపీ తెలిపారు. బేగంపేట పోలీస్ స్టేషన్ పరిధిలో 30-31 మంది మహిళలను, ఎల్‌బీ నగర్ పరిధిలో 19 మందిని రక్షించారు. ఈ కేసులు అక్టోబర్ 30న నమోదు చేశారు.

ఉపాధి, ఉద్యోగం పేరుతో ఆరు రాష్ట్రాల నుంచి యువతులను తీసుకొచ్చినట్టు పోలీసులు గుర్తించారు. ప్రధానంగా పశ్చిమ బెంగాల్, మహారాష్ట్ర, కర్ణాటక నుంచి వీరిని తీసుకొచ్చారు. "అండాలు ఇచ్చాక 10 రోజులు ఉంటే ₹30,000 నుంచి ₹50,000 వస్తుంది" అని చెప్పి రిక్రూట్ చేసినట్టు సీపీ వివరించారు. కొందరికి ఇది ఈవెంట్ మేనేజ్‌మెంట్ పని అని చెప్పినట్టు ఆమె పేర్కొన్నారు.

ఏజెంట్లు వీరి రికార్డులను తయారు చేసి హాస్పిటల్‌కు అటాచ్ చేసినట్టు దర్యాప్తులో తేలింది. ఆ హాస్పిటల్ డాక్టర్ హార్మోన్లు వాడి అండాలను సేకరిస్తున్నట్టు సీపీ చెప్పారు. ఇది చట్టవిరుద్ధం, అనైతికం, మహిళల ఆరోగ్యానికి హానికరం అని ఆమె అన్నారు. ఒక ART సెంటర్ నిర్వాహకుడికి ఏడాదికి దాదాపు ₹2 కోట్ల టర్నోవర్ ఉన్నట్టు గుర్తించారు.

అనుమానిత 16 ఫెర్టిలిటీ సెంటర్ల నుంచి డోనర్ల జాబితా కోరినట్టు, దాన్ని ప్రభుత్వ జాబితాతో పోల్చి చూస్తామని సీపీ తెలిపారు. మెడికల్ అండ్ హెల్త్ డిపార్ట్‌మెంట్ అధికారులకూ నోటీసులు అందజేశారు. ఆర్థిక లావాదేవీల రికార్డులు, డోనర్ వివరాలను లింక్ చేసి దర్యాప్తు ఫైనల్ చేస్తామని ఆమె చెప్పారు. FSL పరీక్ష చేయించనున్నట్టు తెలిపారు.

మహిళలను ట్రాఫిక్ చేస్తున్నారా లేదా అన్న విషయాన్ని ముందుగా తెలుసుకోవాలని సీపీ సూచించారు. తెలియని ప్రదేశానికి, తెలియని ప్రాసెస్‌కు వెళ్లొద్దని ఆమె హెచ్చరించారు. చట్టాన్ని లేదా ప్రాసెస్‌ను తప్పించుకోవడం నేరమని ఆమె అన్నారు. సెంటర్ల సమాధానాల ఆధారంగా మరింత చర్యలు తీసుకుంటామని సీపీ తెలిపారు.