శ్రీ సత్యసాయి జిల్లాలో ఆరేళ్ల బాలికపై వృద్ధురాలు రాయితో దాడి

శ్రీ సత్యసాయి జిల్లా పరిగి మండలం ఊటకూరు గ్రామంలో ఆరేళ్ల బాలికపై ఓ వృద్ధురాలు రాయితో దాడి చేసిన ఘటన చోటుచేసుకుంది. బాలిక తీవ్ర గాయాలతో ఆసుపత్రిలో చికిత్స పొందుతోంది. ఈ ఘటనపై పరిగి పోలీస్ స్టేషన్‌లో కేసు నమోదు అయింది.

బాలిక తల్లిదండ్రులు పని కోసం బయటకు వెళ్లారు. ఆ సమయంలో బాలిక పక్కింటి వద్ద ఆడుకుంటూ జామకాయను కోసింది. దీనిపై కోపం తెచ్చుకున్న వృద్ధురాలు మంచమ్మ బాలికపై దాడి చేసిందని పోలీసులు తెలిపారు.

రాయితో కొట్టడంతో బాలికకు తీవ్ర రక్తస్రావం జరిగింది. దాంతో భయపడిన మంచమ్మ బాలికను తన ఇంట్లోనే దాచిపెట్టింది. తిరిగి వచ్చిన తల్లిదండ్రులు బాలిక కనిపించకపోవడంతో ఊరంతా వెతికారు.

వృద్ధురాలి ఇంటి పెరట్లో రక్తపు మరకలు కనిపించడంతో అనుమానం వచ్చి వెతికారు. అపస్మారక స్థితిలో ఉన్న బాలిక వారికి కనిపించింది. కుక్క కరిచిందని వృద్ధురాలు సమాధానం చెప్పినట్టు సమాచారం.

బాలికను మొదట హిందూపురం ప్రభుత్వ ఆసుపత్రికి తరలించారు. అక్కడి నుంచి మెరుగైన చికిత్స కోసం అనంతపురం తరలించారు. తల్లిదండ్రుల ఫిర్యాదు మేరకు మంచమ్మపై కేసు నమోదు చేసినట్టు పోలీసులు తెలిపారు. దర్యాప్తు కొనసాగుతోంది.