నల్గొండలో ధాన్యం ట్రాక్టర్‌ను ఢీకొన్న RTC బస్సు: 10 మందికి గాయాలు

నల్గొండ జిల్లాలో ధాన్యం లోడ్‌తో వెళ్తున్న ట్రాక్టర్‌ను వెనక నుంచి వచ్చిన RTC బస్సు బలంగా ఢీకొట్టింది. ఈ ప్రమాదంలో 10 మంది తీవ్రంగా గాయపడ్డారు.

వేములపల్లి మండలం శెట్టిపాలం దగ్గర, మహేంద్ర రైస్ మిల్ సమీపంలో అద్దంకి–నార్కట్‌పల్లి రహదారిపై ఈ ఘటన చోటుచేసుకుంది. బస్సు మిర్యాలగూడ డిపో నుంచి నల్గొండకు వెళ్తోంది. ప్రమాద సమయంలో బస్సులో 50 మంది ప్రయాణికులు ఉన్నారు.

గాయపడిన వారిలో బస్సు డ్రైవర్, కండక్టర్ కూడా ఉన్నారు. సమాచారం అందుకున్న పోలీసులు వెంటనే ఘటనాస్థలానికి చేరుకున్నారు. క్షతగాత్రులను మిర్యాలగూడ ప్రభుత్వ ఆసుపత్రికి తరలించారు.

గాయపడిన వారికి ఆసుపత్రిలో చికిత్స కొనసాగుతోంది. ఘటనపై కేసు నమోదు చేసిన పోలీసులు దర్యాప్తు చేస్తున్నారు.