ఇన్‌వెస్ట్ తెలంగాణ గ్లోబల్ సమిట్ 2026 రిజిస్ట్రేషన్లు ప్రారంభం

హైదరాబాద్‌లోని ఫ్యూచర్ సిటీలో వచ్చే నెల 9న ముగిసేలా మూడు రోజుల పాటు ఇన్‌వెస్ట్ తెలంగాణ గ్లోబల్ సమిట్ 2026 జరగనుంది. ఈ సమిట్‌కు రిజిస్ట్రేషన్లు ప్రారంభమయ్యాయి. ప్రభుత్వ అధికారిక పోర్టల్ ద్వారా ప్రతినిధులు ఆన్‌లైన్‌లో నమోదు చేసుకోవచ్చు.

పోర్టల్‌లో లాగిన్ అవ్వడం, వివరాలు నమోదు చేయడం, కన్ఫర్మేషన్ పొందడం అనే మూడు దశల్లో రిజిస్ట్రేషన్ పూర్తవుతుంది. ఇన్‌వెస్టర్లు, ఇండస్ట్రియల్ ప్రతినిధులు, ఎంటర్‌ప్రెన్యూర్లు, స్టార్టప్‌లు ముందుగానే రిజిస్టర్ చేసుకోవాలని ప్రభుత్వం కోరింది.

సమిట్‌లో భాగంగా తెలంగాణ ఇన్నోవేషన్ స్టార్టప్ ఛాలెంజ్‌ను ప్రభుత్వం నిర్వహిస్తోంది. వ్యవసాయం, ఇంధనం, ఆరోగ్య సంరక్షణ, విద్య, ప్రజా మౌలిక సదుపాయాల రంగాల్లో ప్రభుత్వ శాఖలు గుర్తించిన సమస్యలకు పరిష్కారాలు సమర్పించాలి. సొల్యూషన్ ఐడియాలు ఉన్న స్టార్టప్‌లు, ఇన్నోవేటర్లు ప్రభుత్వ వెబ్‌సైట్ ద్వారా దరఖాస్తు చేసుకోవచ్చు. దరఖాస్తులకు ఈ నెల 20 చివరి తేదీ.

ఎంపికైన పరిష్కారాలను గ్లోబల్ సమిట్‌లో ప్రదర్శిస్తారు. సదస్సులో ప్రత్యేక తెలంగాణ పెవిలియన్ ఏర్పాటు చేస్తారు. ఇందులో చేనేత మగ్గం, బతుకమ్మ ఆకృతులు, కాకతీయుల రాతి శిల్పకళ ప్రత్యేక ఆకర్షణలుగా ఉండనున్నాయి. మహిళా పారిశ్రామికవేత్తల కోసం ప్రత్యేక శక్తి పెవిలియన్ ఉంటుంది.

"పొలం నుంచి భోజనం వరకు" థీమ్‌తో వ్యవసాయ రంగాల పెవిలియన్‌ను 3,500 చదరపు మీటర్ల విస్తీర్ణంలో సిద్ధం చేస్తున్నారు.