హైదరాబాద్ మెట్రోకు ₹13,600 కోట్ల రీఫైనాన్సింగ్ ఒప్పందం

హైదరాబాద్ మెట్రో రైలు ఇండియన్ రైల్వే ఫైనాన్స్ కార్పొరేషన్ (IRFC) తో కీలక రీఫైనాన్సింగ్ ఒప్పందం కుదుర్చుకుంది. ఈ ఒప్పందం కింద ₹13,600 కోట్ల రుణ సదుపాయం అందుతుంది. ఢిల్లీలో ఈ ఒప్పందంపై సంతకాలు జరిగాయి.

IRFC CMD మనోజ్ కుమార్ దుబే, తెలంగాణ ప్రభుత్వ ప్రధాన కార్యదర్శి రామకృష్ణరావు సమక్షంలో ఈ ప్రక్రియ పూర్తయింది. ప్రస్తుతం ఉన్న రుణాలను రీఫైనాన్స్ చేసేందుకు ఈ నిధులు వినియోగిస్తారు. నాన్ కన్వర్టబుల్ డిబెంచర్లు, కమర్షియల్ పేపర్లు, వర్కింగ్ క్యాపిటల్ రీఫైనాన్సింగ్ కోసం ఇవి ఉపయోగపడతాయి.

20 ఏళ్ల కాల పరిమితితో త్రైమాసిక చెల్లింపుల విధానంలో రుణ సదుపాయం ఇవ్వనున్నారు. ఈ ఒప్పందం వల్ల మెట్రోపై ఉన్న ఆర్థిక భారం తగ్గుతుందని, భవిష్యత్ విస్తరణ ప్రణాళికలకు నిధుల వెసులబాటు కలుగుతుందని అధికారులు తెలిపారు.

ప్రత్యేకంగా, Larsen & Toubro నుంచి LMT మెట్రో రైల్ హైదరాబాద్ లిమిటెడ్ 100% యాజమాన్యం తెలంగాణ ప్రభుత్వానికి బదిలీ కానుంది. దీంతో హైదరాబాద్ మెట్రో పూర్తిగా రాష్ట్ర ప్రభుత్వ ఆధీనంలోకి వస్తుంది.