హైదరాబాద్‌లో వీధుల్లో తిరుగుతున్న మహిళను చౌటుప్పల్ ఆశ్రమంలో చేర్చిన పోలీసులు

హైదరాబాద్ లంగర్ హౌస్ పోలీస్ స్టేషన్ పరిధిలో ఓ మహిళ రోడ్లపై దిక్కుతోచని స్థితిలో తిరుగుతుండడాన్ని స్థానికులు గమనించి పోలీసులకు సమాచారం ఇచ్చారు. లంగర్ హౌస్ పోలీసు కానిస్టేబుల్ రేణుకాదేవి ఆ మహిళను గుర్తించి పోలీసు స్టేషన్ కు తీసుకువచ్చారు. అనంతరం ఆమెను చౌటుప్పల్ లోని అమ్మా నాన్న అనాథ ఆశ్రమానికి తరలించారు.

ఆశ్రమంలో మహిళకు చింపిరి జుట్టు తీసి, మంచి దుస్తులు ఇచ్చారు. శివాలయంలో దర్శనం చేయించడంతో ఆమె సాధారణ మనిషిగా కనిపిస్తోంది. ఈ విషయంపై రేణుకాదేవి మాట్లాడుతూ, గతంలోనూ ఇద్దరు వ్యక్తులను ఇక్కడకు తీసుకువచ్చామని, వారికి బాగా చూసుకున్నారని తెలిపారు. అందుకే మళ్లీ ఇక్కడికే తీసుకువచ్చామని చెప్పారు.

ప్రస్తుతం ఆ మహిళ ఆశ్రమంలో సేద తీరుతోంది. ఆమెను గుర్తించిన వారు ఆశ్రమానికి వచ్చి తీసుకువెళ్లవచ్చని పోలీసులు తెలిపారు.