హైదరాబాద్‌లో తాగునీటి డిమాండ్ కొత్త రికార్డు: రోజుకు 15,000 ట్యాంకర్ బుకింగ్‌లు

హైదరాబాద్‌లో తాగునీటి డిమాండ్ ఈ వేసవిలో కొత్త రికార్డు స్థాయికి చేరుకుంది. ప్రతిరోజు 15,000 కు పైగా వాటర్ ట్యాంకర్ల బుకింగ్‌లు నమోదవుతున్నాయి. గత ఏడాది గరిష్టంగా 12,000 బుకింగ్‌లు వచ్చిన స్థానంలో ఈ సంఖ్య ఉండటం పరిస్థితి తీవ్రతను చూపిస్తోంది.

జూన్ నెల ప్రారంభమైనా వర్షాలు లేకపోవడం, ఎండల తీవ్రత కొనసాగడం, భూగర్భజలాలు అడుగంటిపోవడం డిమాండ్ పెరుగుదలకు ప్రధాన కారణాలు. ముఖ్యంగా నగర శివారు ప్రాంతాల్లో బోర్లు ఎండిపోవడంతో ప్రజలు పూర్తిగా ట్యాంకర్ల మీదే ఆధారపడుతున్నారు.

పెరిగిన డిమాండ్‌తో నీటి సరఫరా వ్యవస్థపై ఒత్తిడి ఎక్కువైంది. దీన్ని ఎదుర్కొనేందుకు జలమండలి అధికారులు పలు చర్యలు చేపట్టారు. సింగూరు రిజర్వాయర్ నుంచి అత్యవసర పంపింగ్ మొదలైంది. మరో వారం రోజుల్లో భారీ వర్షాలు కురవకపోతే కృష్ణా బేసిన్ నుంచి కూడా ఎమర్జెన్సీ పంపింగ్ చేసేందుకు సిద్ధంగా ఉన్నారు. నగర నీటి సరఫరా వనరులపై నిరంతరం నిఘా ఉంచుతూ నీటి నిల్వలను సమన్వయం చేస్తున్నారు.

డిమాండ్ పెరగడంతో చాలా ప్రాంతాల్లో నీటి సరఫరా సమయం తగ్గింది. గతంలో రోజుకు రెండు గంటల చొప్పున సరఫరా జరిగిన చోట ఇప్పుడు గంట నుంచి గంటన్నర వరకు మాత్రమే నీరు ఇస్తున్నారు. నీటి లభ్యతను బట్టి రానున్న రోజుల్లో ఈ టైమింగ్స్‌లో మరింత మార్పులు రావచ్చని అధికారులు సూచిస్తున్నారు.

నీటిని పొదుపుగా వినియోగించాలని, లీకేజీలు, వృధాను నివారించాలని అధికార యంత్రాంగం ప్రజలకు విజ్ఞప్తి చేసింది. వర్షాల పరిస్థితి మెరుగైతే ఒత్తిడి తగ్గే అవకాశం ఉన్నప్పటికీ, ఎలాంటి పరిస్థితుల్లోనూ తాగునీటి కొరత రాకుండా అన్ని చర్యలు తీసుకుంటామని జలమండలి స్పష్టం చేసింది.