హైదరాబాద్, తెలంగాణలో భారీ వర్షాలు; పలు ప్రాంతాలు జలమయం, సీఎం సమీక్ష

హైదరాబాద్, సంగారెడ్డి, యాదాద్రి భువనగిరి, సూర్యపేట, రంగారెడ్డి సహా పలు తెలంగాణ జిల్లాల్లో భారీ వర్షాలు కురిశాయి. దీంతో పలు ప్రాంతాల్లో రోడ్లు జలమయమయ్యాయి. వాహనదారులు ఇబ్బందులు పడ్డారు.

హైదరాబాద్ శంషాబాద్ వద్ద హైదరాబాద్-బెంగళూరు హైవేపై వరద నీరు నిలిచింది. సిబ్బంది మోటార్లతో నీటిని తోడేశారు. మియాపూర్, చందానగర్, మాదాపూర్, పంచాగుట్ట, గచ్చిబౌలి, రాజేంద్రనగర్ తదితర ప్రాంతాల్లోనూ ఓ మోస్తారు వర్షం కురిసింది.

సంగారెడ్డి జిల్లా సదాశివపేటలో ఈదురుగాలులతో కూడిన భారీ వర్షం బీభత్సం సృష్టించింది. పెద్ద ఎత్తున చెట్లు విరిగిపడ్డాయి. ట్రాఫిక్ కంట్రోల్ బూత్ గాలికి కొట్టుకుపోయింది. వికారాబాద్ జిల్లా పరిగిలో ఉరుములు, మెరుపులతో కూడిన భారీ వర్షం కురిసింది.

ఉమ్మడి నల్గొండ జిల్లాలోని చిట్యాల, రామన్నపేట, చౌటుప్పల మండలాల్లో భారీ వర్షం కురిసింది. మునుగోడులో కల్వట్ తెగిపోవడంతో మునుగోడు-చండూరు మధ్య రాకపోకలు నిలిచిపోయాయి. చౌటుప్పల మండలం స్వాములవారి లింగోటం వద్ద వర్షం కారణంగా ధాన్యం తడిసిపోయింది. రైతులు జేసీబీ సాయంతో రక్షణ చర్యలు చేపట్టారు.

భారీ వర్షాలపై సీఎం రేవంత్ రెడ్డి సమీక్షా సమావేశం నిర్వహించారు. హైదరాబాద్ కోర్ అర్బన్ రీజన్ పరిధిలో హై అలర్ట్ గా ఉండాలని అధికారులను ఆదేశించారు. అన్ని శాఖలు సమన్వయంతో పని చేయాలని, ముంపు ప్రాంతాల్లో అప్రమత్తంగా ఉండాలని సూచించారు.

హైదరాబాద్ నగరంలో వాటర్ లాగింగ్ ప్రాంతాలను సీపీ సజనార్ పరిశీలించారు. మసబ్ ట్యాంక్, లంగర్ హౌస్, మెహదీపట్నంలో పర్యటించి, హైడ్రా, రెవెన్యూ, జీహెచ్ఎంసీ, విద్యుత్ శాఖలతో సమీక్ష నిర్వహించారు. రాబోయే మూడు నెలలు ప్రజలు అప్రమత్తంగా ఉండాలని, వర్ష హెచ్చరికలను పాటించాలని, రెయిన్ కోట్ తీసుకెళ్లడం, ప్రయాణ ప్రణాళిక మార్చుకోవడం వంటి జాగ్రత్తలు తీసుకోవాలని కోరారు.

డీజీపీ సీవీ ఆనంద్ కూడా వర్షాలపై సమీక్ష నిర్వహించారు. మల్కంపేట చెరువు ప్రాంతాన్ని పరిశీలించి, రోడ్లపై నిలిచిన నీటిని తొలగించేందుకు చర్యలు తీసుకోవాలని పోలీసులను ఆదేశించారు. అత్యవసర పరిస్థితుల్లో సహాయం చేయడానికి సిద్ధంగా ఉండాలని సూచన చేశారు.